რამდენიმე ევროპული ქვეყნისა და ევროკავშირის ინსტიტუტის ლიდერებმა ერთობლივი განცხადება გაავრცელეს, რომელშიც „მიესალმნენ პრეზიდენტ ტრამპის მიერ უკრაინაში სამართლიანი და მდგრადი მშვიდობის უზრუნველყოფის მცდელობებში მიღწეულ მნიშვნელოვან პროგრესს“.

განცხადებაში, ასევე, ნათქვამია, რომ ლიდერები მიესალმნენ პრეზიდენტ ზელენსკის და პრეზიდენტ ტრამპის გუნდებს, ასევე, ევროპულ გუნდებს შორის ბოლო დღეებისა და კვირების განმავლობაში მჭიდრო თანამშრომლობას.

ევროპელი ლიდერები შეთანხმდნენ, რომ ტრამპთან და ზელენსკისთან ითანამშრომლებენ „მდგრადი მშვიდობის მისაღწევად, რომელიც შეინარჩუნებს უკრაინის სუვერენიტეტს და ევროპულ უსაფრთხოებას“.

„ლიდერები შეთანხმდნენ, რომ უკრაინის უსაფრთხოების, სუვერენიტეტისა და კეთილდღეობის უზრუნველყოფა უფრო ფართო ევროატლანტიკური უსაფრთხოების განუყოფელი ნაწილია. მათ ნათლად განაცხადეს, რომ უკრაინა და მისი ხალხი იმსახურებენ აყვავებულ, დამოუკიდებელ და სუვერენულ მომავალს“, - ნათქვამია განცხადებაში.

გარდა ამისა, აშშ-მა და ევროპელმა ლიდერებმა „აიღეს ვალდებულება, ერთად იმუშაონ, რათა უკრაინას მიაწოდონ სანდო უსაფრთხოების გარანტიები და ზომები ეკონომიკური აღდგენის მხარდასაჭერად, ომის დასრულების შესახებ შეთანხმების კონტექსტში“.

ასეთ ვალდებულებებს შორის, განცხადებაში ჩამოთვლილია:

• უკრაინის შეიარაღებული ძალების განვითარებისთვის მდგრადი და მნიშვნელოვანი მხარდაჭერის უზრუნველყოფა, რომლებიც 800 000 სამხედრო მოსამსახურის დონეზე უნდა დარჩნენ, რათა შეძლონ კონფლიქტების შეკავება და უკრაინის ტერიტორიის დაცვა

• შეიქმნას ევროპის ხელმძღვანელობით შექმნილი „უკრაინული მრავალეროვნული ძალა“, რომელიც შედგება „მსურველთა კოალიციაში“ მონაწილე ქვეყნების მოხალისეებისგან და აშშ-ის მხარდაჭერით. ეს ხელს შეუწყობს უკრაინის შეიარაღებული ძალების აღდგენას, უკრაინის საჰაერო სივრცის უსაფრთხოების უზრუნველყოფას და საზღვაო უსაფრთხოების შენარჩუნებას

• აშშ-ის ხელმძღვანელობით შექმნილი ცეცხლის შეწყვეტის მონიტორინგისა და ვერიფიკაციის მექანიზმი საერთაშორისო ორგანიზაციების მონაწილეობით, რათა უზრუნველყოფილ იქნეს ნებისმიერი მომავალი თავდასხმის შესახებ ადრეული გაფრთხილება, დამნაშავეების იდენტიფიცირება და ნებისმიერ დარღვევაზე რეაგირება

• სამართლებრივი ვალდებულება, ეროვნული პროცედურების დაცვით, მომავალი შეიარაღებული თავდასხმის შემთხვევაში მშვიდობისა და უსაფრთხოების აღსადგენად ზომების მიღების შესახებ. ეს ზომები შეიძლება მოიცავდეს შეიარაღებულ ძალებს, სადაზვერვო და ლოგისტიკურ დახმარებას, ეკონომიკურ და დიპლომატიურ ქმედებებს

• უკრაინის მომავალ კეთილდღეობაში ინვესტიციების ჩადება, მათ შორის აღდგენისა და რეკონსტრუქციისთვის რესურსების გამოყოფა, ორმხრივად სასარგებლო სავაჭრო შეთანხმებების დადება და რუსეთის მიერ უკრაინისთვის მიყენებული ზიანის ანაზღაურების აუცილებლობის გათვალისწინება. ამის ფარგლებში, ევროკავშირში არსებული რუსული სუვერენული აქტივები გაყინულია

• მტკიცე მხარდაჭერა უკრაინის ევროკავშირში გაწევრიანებას

როგორც განცხადებაშია ნათქვამი, ყველა მათგანმა პირობა დადო, რომ უახლოეს დღეებსა და კვირებში სწრაფად იმუშავებენ შემდგომი პროგრესის მისაღწევად, რათა ერთობლივად დადონ და დაამტკიცონ მდგრადი სამშვიდობო შეთანხმება. მათ კიდევ ერთხელ დაადასტურეს მტკიცე მხარდაჭერა პრეზიდენტ ზელენსკის და უკრაინის ხალხის მიმართ რუსეთის უკანონო შეჭრის წინააღმდეგ ბრძოლაში და სამართლიანი და მდგრადი მშვიდობის მიღწევაში.

ლიდერებმა მხარდაჭერა გამოუცხადეს ზელენსკის და შეთანხმდნენ, რომ მხარს დაუჭერენ მის ნებისმიერ გადაწყვეტილებას უკრაინის კონკრეტულ საკითხებთან დაკავშირებით.

მათ კიდევ ერთხელ დაადასტურეს, რომ საერთაშორისო საზღვრების ძალის გამოყენებით შეცვლა შეუძლებელია. ტერიტორიასთან დაკავშირებული გადაწყვეტილებები უკრაინის ხალხს ეკუთვნის, მას შემდეგ, რაც უსაფრთხოების საიმედო გარანტიები ეფექტურად განხორციელდება.

ისინი შეთანხმდნენ, რომ ზოგიერთი საკითხი მოლაპარაკებების ბოლო ეტაპზე უნდა გადაწყდეს.

„მათ ნათლად განაცხადეს, რომ ნებისმიერი შეთანხმების დროს, არაფერი ითვლება შეთანხმებულად, ვიდრე ყველაფერზე შეთანხმება არ მოხდება და რომ ყველა მხარემ ინტენსიურად უნდა იმუშაოს იმ გადაწყვეტის მისაღწევად, რომელიც უზრუნველყოფს საომარი მოქმედებების ხანგრძლივ შეწყვეტას“, - ნათქვამია განცხადებაში.

ერთობლივ განცხადებას ხელს აწერენ: გერმანიის კანცლერი ფრიდრიხ მერცი, ფინეთის პრეზიდენტი ალექსანდრ სტუბი, საფრანგეთის პრეზიდენტი ემანუელ მაკრონი, ევროპული საბჭოს პრეზიდენტი ანტონიუ კოშტა, ევროკომისიის პრეზიდენტი ურსულა ფონ დერ ლეიენი, შვედეთის პრემიერ-მინისტრი ულფ კრისტერსონი, დანიის პრემიერ-მინისტრი მეტე ფრედერიქსენი, იტალიის პრემიერ-მინისტრი ჯორჯია მელონი, ნიდერლანდების პრემიერ-მინისტრი დიკ სხოოფი, ნორვეგიის პრემიერ-მინისტრი იონას გარ სტიორე, ასევე პოლონეთის პრემიერ-მინისტრი დონალდ ტუსკი და დიდი ბრიტანეთის პრემიერ-მინისტრი კირ სტარმერი.