ესპანეთის პრემიერ-მინისტრმა პედრო სანჩესმა ევროკომისიის პრეზიდენტ ურსულა ფონ დერ ლაიენს წერილი გაუგზავნა, რომელშიც „ღრმა შეშფოთება“ გამოთქვა ზოგიერთი ევროპული მთავრობის რეაქციის გამო, რომელიც ამ კვირაში ესპანეთის ანკლავ სეუტაში დაახლოებით 50 000 მიგრანტის უკანონო შესვლას მოჰყვა. წერილის შესახებ ინფორმაციას გამოცემა „ელ პაისი“ ავრცელებს. 

წერილში სანჩესი წერს, რომ ესპანეთმა 48 საათზე ნაკლებ დროში შეძლო საზღვარზე კონტროლის აღდგენა, ჰუმანიტარული დახმარების გაწევა, ქვეყანაში უკანონოდ შესული ფაქტობრივად ყველა მიგრანტის დაბრუნება და მათი ევროკავშირის სხვა ქვეყნებში არაკონტროლირებადი გადაადგილების აღკვეთა.

მისი თქმით, ეს ქმედებები მაროკოსთან კოორდინაციით და სხვა წევრი სახელმწიფოების „ძალიან სუსტი მხარდაჭერით“ განხორციელდა.

ესპანეთის პრემიერ-მინისტრმა ასევე დაიცვა ესპანეთის ბოლო წლების მიგრაციული პოლიტიკა, რომელმაც, მისი თქმით, რადიკალურად შეამცირა არალეგალური მიგრანტების ჩასვლების რაოდენობა და ესპანეთი ევროკავშირის მეორე ყველაზე უსაფრთხო სასაზღვრო ქვეყნად აქცია, მიუხედავად იმისა, რომ ის ერთადერთი წევრი სახელმწიფოა, რომელსაც აფრიკასთან სახმელეთო საზღვარი აქვს.

სანჩესმა, ასევე, გაიხსენა, რომ ესპანეთმა მხარი დაუჭირა სხვა ევროპელ პარტნიორებს წინა მიგრაციული კრიზისების დროს და გაიხსენა 2021 წელს აღმოსავლეთ ევროპაში ბელორუსის გავლით ჩასული მიგრანტების და 2023 წელს იტალიის კუნძულ ლამპედუზაზე ჩასული მიგრანტების მიერ შექმნილი ვითარება. 

თავის წერილში მან გააკრიტიკა ზოგიერთი მთავრობის წინადადება ესპანეთის შენგენის ზონიდან დროებით გარიცხვის შესახებ და აღნიშნა, რომ ასეთი პოზიცია „ცრურწმენების, ყალბი ამბების, უმეცრების ან პოლიტიკური ინტერესების შედეგია და ეწინააღმდეგება ევროპულ კანონმდებლობას, ჰუმანიტარულ სამართალს და ევროპული სოლიდარობის პრინციპებს“.

ესპანეთის პრემიერ-მინისტრმა, ასევე, აღნიშნა, რომ სეუტა თავად არ შედის შენგენის ზონაში და თითქმის ყველა არალეგალი მიგრანტი უკვე დაბრუნებულია მაროკოში.

ამ სიტუაციის გათვალისწინებით, სანჩესმა ევროკავშირის საბჭოს თავმჯდომარე ქვეყანას ირლანდიას მიმართა თხოვნით, სასწრაფოდ მოიწვიოს შინაგან საქმეთა მინისტრების საგანგებო ვიდეოკონფერენცია, რათა კრიზისზე კოორდინირებული ევროპული პასუხი შემუშავდეს და კიდევ ერთხელ დადასტურდეს, რომ ევროკავშირის გარე საზღვრების დაცვა ყველა წევრი სახელმწიფოს საერთო პასუხისმგებლობაა.