ამჟამად არ არსებობს არანაირი მინიშნება იმისა, რომ რუსეთი ბალტიის რომელიმე სახელმწიფოზე ან მთლიანად ნატოზე თავდასხმას აპირებს, - ამის შესახებ ERR-თან ინტერვიუში ესტონეთის საგარეო დაზვერვის სამსახურის გენერალურმა დირექტორმა კაუპო როზინმა განაცხადა.

მისი თქმით, ნატოს რეაქციების შედეგად, რუსეთმა შეცვალა თავისი ქცევა მთელ რეგიონში მომხდარი სხვადასხვა ინციდენტების შემდეგ.

„დღეს ჩვენ ვხედავთ, რომ რუსეთს ამ დროისთვის არ აქვს განზრახვა, თავს დაესხას ბალტიის რომელიმე ქვეყანას ან ნატოს უფრო ფართო გაგებით. ცხადია, რომ რუსეთი პატივს სცემს ნატოს და ცდილობს ამ დროს თავიდან აიცილოს ნებისმიერი ღია კონფლიქტი“, - აღნიშნა როზინმა.

ასევე, როზინის თქმით, ნატოს მისიის დაწყების შემდეგ, საკაბელო ხაზებთან დაკავშირებული ინციდენტები აღარ დაფიქსირებულა.

„ჩვენ ვხედავთ, რომ რუსული თვითმფრინავები ახლა ძალიან ფრთხილად აკვირდებიან ბალტიის ზღვაზე ფრენის ტრაექტორიებს და ზედმიწევნით ზუსტად იცავენ მარშრუტებს, რათა თავიდან აიცილონ ინციდენტები. ასევე, ნატოს მისიის დაწყების შემდეგ, აქ საკაბელო ხაზებთან დაკავშირებული ინციდენტები აღარ მომხდარა. ასეთია ამჟამინდელი სიტუაცია.

რა თქმა უნდა, ეს არ გამორიცხავს მომავალში ინციდენტების შესაძლებლობას, სამხედრო აქტივობის მაღალი დონისა და უკრაინაში მიმდინარე ომის გათვალისწინებით – თეორიულად, ეს ჯერ კიდევ შესაძლებელია. თუმცა, ჩვენ არ ვხედავთ, რომ რუსეთი ახლა განზრახ ცდილობს რაიმე ესკალაციას“, - აცხადებს ესტონეთის საგარეო დაზვერვის ხელმძღვანელი.