უკრაინამ უკვე გამოავლინა ცეცხლის სრულად შეწყვეტის სურვილი, მაგრამ რუსეთი არ იზიარებს ამ სურვილს და ამერიკელებმა ეს დაინახეს. UNIAN-ის კორესპონდენტის ცნობით, ამის შესახებ უკრაინის პრეზიდენტის ადმინისტრაციის ხელმძღვანელმა ანდრეი ერმაკმა ჟურნალისტებთან საუბრისას განაცხადა.

კერძოდ, ერმაკმა უპასუხა კითხვას, ესმის თუ არა ამერიკულ მხარეს ის, რომ სწორედ რუსეთს არ სურს მშვიდობა საუდის არაბეთში შეხვედრების ორი რაუნდის შემდეგ.

„მე ასე ვფიქრობ. ვფიქრობ, რომ ჯიდასა და ერ-რიადში შეხვედრების მთავარი შედეგი ის არის, რომ ამერიკულ მხარეს უკრაინის მიმართ არანაირი კითხვები არ აქვს. უკრაინა ავლენს თავისი პოზიციის აბსოლუტურ გამჭვირვალობას, აბსოლუტურ ადეკვატურობას. ამიტომ, ვფიქრობთ, რომ დღეს, მართლაც, ცეცხლის სრულად შეწყვეტა ნამდვილად არის ის, რისკენაც ვისწრაფვით და ეს ლოგიკური და სწორია“, - ხაზგასმით აღნიშნა ერმაკმა.

ამასთან, მისი თქმით, დღეს რუსული მხარე ამას მხარს არ უჭერს.

„ჩვენ მიგვაჩნია, რომ სწორედ ასეთი ძლიერი პოზიცია და ზეწოლა რუსეთზე ამერიკელებისა და სხვა პარტნიორების მხრიდან არის ის გზა, რომელიც უნდა გავიაროთ“, - აღნიშნა ერმაკმა.

ამასთან, მას ჰკითხეს, რამდენად წარმატებულია ზღვაზე და ენერგეტიკულ სექტორში ცეცხლის შეწყვეტის შეთანხმებების შესრულების მონიტორინგი.

„სამწუხაროდ, დღეს ასეთი მკაფიო მონიტორინგისა და კონტროლის მექანიზმი არ არსებობს. მიგვაჩნია, რომ სწორედ ამერიკულ მხარეს აქვს ამის განხორციელების ყველა შესაძლებლობა. ეს არამარტო მონიტორინგს და კონტროლს უნდა მოითხოვდეს, არამედ [გაგებასაც], თუ რა მოხდება, თუ ის დაირღვა? დღეს ეს ისე ხდება, რომ სამხედროებს ყოველდღიურად აქვთ რუსული მხარის მხრიდან დარღვევების ფაქტები. ჩვენ გადავცემთ [ამ ინფორმაციას] ამერიკულ მხარეს, გადავცემთ სხვა პარტნიორებს და ველით, რომ ისინი რეალურ ნაბიჯებს გადადგამენ რუსეთზე ზეწოლის მიზნით“, - განაცხადა ერმაკმა.

მან დასძინა, რომ ამჟამად მიმდინარეობს მუშაობა მექანიზმის შემუშავებაზე, როგორ გააკონტროლონ დუმილის რეჟიმის დაცვა.

„ამის გარეშე, ძნელია იმის თქმა, რომ ის მუშაობს”, - აღნიშნა ერმაკმა.

მას ასევე ჰკითხეს, იგეგმება თუ არა ცეცხლის შეწყვეტის მოლაპარაკებების შემდეგი რაუნდები.

„ჯერჯერობით კონკრეტული თარიღები არ არის. ვფიქრობ, რომ მალე ეს საუბრები - პირველ რიგში, ამერიკელებთან ჩვენი საუბრები - გაგრძელდება. რაც შეეხება შეხვედრებს, ვფიქრობ, ისინი მალე გაგრძელდება“, - განაცხადა ერმაკმა.