საფრანგეთის პრეზიდენტი ემანუელ მაკრონი ესპანეთის პრემიერ-მინისტრ პედრო სანჩესს ესაუბრა და სეუტაში შექმნილი რთული ვითარების ფონზე მხარდაჭერა გამოუცხადა. ამის შესახებ საფრანგეთის ლიდერმა სოციალურ ქსელ X-ში დაწერა.

მაკრონის თქმით, მან სანჩესთან საუბრისას ესპანელ ხალხს სოლიდარობა გამოუცხადა და მადრიდს „ყველა საჭირო დახმარება“ შესთავაზა, მათ შორის ევროკავშირის სასაზღვრო სააგენტო Frontex-ის ჩართულობით.

„დადებითად ვაფასებ მაროკოსთან მიმდინარე თანამშრომლობას, რომლის შედეგადაც სეუტიდან უკან, მაროკოში, უკვე 40 ათასზე მეტი ადამიანია დაბრუნებული. ჩვენი შინაგან საქმეთა მინისტრები მუდმივ კომუნიკაციაში იქნებიან, რათა პროცესებს თვალი ყურადღებით ადევნონ“, – აღნიშნავს მაკრონი.

საფრანგეთის პრეზიდენტის განმარტებით, სეუტიდან შენგენის ზონაში ავტომატურად გადაადგილება შეუძლებელია, ვინაიდან ესპანეთის საზღვარზე შესაბამისი კონტროლი მოქმედებს.

მისივე თქმით, საფრანგეთმა ესპანეთთან სასაზღვრო ზოლზე უსაფრთხოების ზომები კიდევ უფრო გაამკაცრა და წინა წლებში დაწესებულ შეზღუდვებს დამატებითი რესურსი მიამატა.

„სეუტიდან შენგენის ზონის სხვა ქვეყნებში თავისუფლად მიმოსვლა არ ვრცელდება. მიუხედავად ამისა, გუშინ შინაგან საქმეთა მინისტრს დავავალე, საჭიროების შემთხვევაში, ესპანეთთან საზღვარზე კონტროლი კიდევ უფრო გაძლიერდეს. ამ მიზნით უკვე მობილიზებულია მობილური ძალების ოთხი ქვედანაყოფი, პროცესში ასევე ჩართულია ავიაცია და დრონები“, – წერს მაკრონი.