იმ ფონზე, როდესაც მსოფლიო ლიდერები გაეროს გენერალურ ასამბლეაზე იკრიბებიან და მზარდ შეშფოთებას გამოთქვამენ ახლო აღმოსავლეთში მიმდინარე კონფლიქტისა და ჰორმუზის სრუტის ჩაკეტვის გამო, საფრანგეთის პრეზიდენტმა ემანუელ მაკრონმა განაცხადა, რომ საფრანგეთი საუდის არაბეთის ნავთობის ექსპორტის მნიშვნელოვანი ობიექტის დასაცავად ქვეყანაში თავდაცვით საშუალებებს, მათ შორის სამხედრო პერსონალს, გაგზავნის. აღნიშნული ობიექტი „ჰუსიტების“ ბოლოდროინდელი თავდასხმის შედეგად დაზიანდა.

მაკრონმა განაცხადა, რომ საფრანგეთმა დაასრულა საუდის არაბეთთან მოლაპარაკებები წითელი ზღვის სანაპიროზე მდებარე იანბუს ენერგეტიკული ექსპორტის კომპლექსის უსაფრთხოების უზრუნველყოფაში დახმარების თაობაზე.

„ჩვენ გავგზავნით სამხედრო რესურსებს, კერძოდ, ჯარისკაცებს, რადარებსა და თავდაცვის სისტემებს, ამ ობიექტის დასაცავად - არა რაიმე კონფლიქტში ჩასართავად, არამედ ამ ობიექტის დასაცავად“, — განაცხადა მაკრონმა.

საფრანგეთის პრეზიდენტის თქმით, აღნიშნული ობიექტი ადრე დღეში 5 მილიონ ბარელზე მეტ ნავთობს ამუშავებდა. მან რეგიონული ენერგეტიკული ინფრასტრუქტურის დაცვა შეაფასა, როგორც გლობალური საწვავის მიწოდების შეფერხებების თავიდან აცილებისკენ მიმართული უფრო ფართო ძალისხმევის ნაწილი.

მაკრონმა განაცხადა, რომ ცოტა ხნის წინ უმასპინძლა საუდის არაბეთის მემკვიდრე პრინც მოჰამედ ბინ სალმანს, ერაყის პრემიერ-მინისტრს და იორდანიისა და ლიბანის ლიდერებს, ალტერნატიული ენერგომარშრუტების უზრუნველყოფისა და მარაგების შენარჩუნების ძალისხმევის ფარგლებში.

მას შემდეგ, რაც კონფლიქტი მთელ ახლო აღმოსავლეთში გავრცელდა, საფრანგეთმა უკვე გაზარდა თავისი სამხედრო წარმომადგენლობა რეგიონში: არაბთა გაერთიანებულ საამიროებში „რაფალის“ (Rafale) ტიპის ავიაგამანადგურებლები გაგზავნა, ხოლო ხმელთაშუა ზღვაში ბირთვული ძრავით აღჭურვილი ავიამზიდი „შარლ დე გოლი“ განათავსა.