აშშ-ის პრეზიდენტი დონალდ ტრამპი ნიუ-იორკში გაეროს გენერალური ასამბლეის სესიის ფარგლებში დიდი ბრიტანეთის პრემიერ-მინისტრ ენდი ბერნჰემს პირისპირ პირველად შეხვდა. შეხვედრაზე მან ბერნჰემი შეაქო და მას „ბუნებით ბიზნესმენი“ უწოდა. ამის შესახებ Reuters-ი წერს. 

ამასთან, ტრამპმა გააკრიტიკა დიდი ბრიტანეთის შეთანხმება მავრიკის რესპუბლიკასთან ჩაგოსის არქიპელაგის სუვერენიტეტის დათმობასთან დაკავშირებით, სადაც აშშ-ისა და დიდი ბრიტანეთის ერთობლივი სამხედრო ბაზა მდებარეობს.

„ამ შეთანხმებას მხარს არ ვუჭერ. მიმაჩნია, რომ ეს საშინელებაა. ეს საშინელი გარიგება იყო. ვიღაცამ მოითხოვა საკუთრების უფლებები, რომლებიც არავის უხსენებია ათწლეულების და საუკუნეების განმავლობაში. ვფიქრობ, ეს აბსურდულია. არა, ჩვენ ეს განვიხილეთ და ეს სტრატეგიულად ძალიან მნიშვნელოვანია“, - განაცხადა ტრამპმა. 

სხვა მხრივ, ტრამპმა ბერნჰემი შეაქო და აღნიშნა, რომ ბოლო ათწლეულის განმავლობაში დიდი ბრიტანეთის რიგით მეშვიდე პრემიერ-მინისტრი არის ადამიანი, რომელთანაც თანამშრომლობა შეუძლია და პატრიოტი, რომელმაც ქვეყანა აღმავლობის გზაზე დააყენა მას შემდეგ, რაც ივლისში ყოფილი პრემიერ-მინისტრი კირ სტარმერი შეცვალა.

„ვფიქრობ, ამჟამად, პრემიერ-მინისტრ ენდისთან ჩემი ურთიერთობიდან გამომდინარე, ძალიან კარგად მივდივართ. ვფიქრობ, ის ბუნებით ბიზნესმენია. ჩვენ ბევრი დისკუსია გვქონდა - ამ შეხვედრამდეც კი ტელეფონით არაერთხელ ვესაუბრეთ ერთმანეთს“, — განაცხადა ტრამპმა.

შეხვედრის დასრულების შემდეგ ბერნჰემმა ჟურნალისტებს განუცხადა, რომ „შეხვედრა ძალიან იმედისმომცემი იყო“. მისი თქმით, ორმა ლიდერმა „საერთო ენა“ გამონახა ისეთ საკითხებზე, როგორებიცაა ცხოვრების გაძვირებასთან დაკავშირებული პრობლემების მოგვარება, ახლო აღმოსავლეთში კონფლიქტის დასრულება და ეკონომიკური ზრდის სტიმულირების მიზნით ქვეყნების რეინდუსტრიალიზაცია.

ჩაგოსის არქიპელაგთან დაკავშირებით ბერნჰემმა აღნიშნა, რომ ეს პრობლემა მას მემკვიდრეობით ერგო და გამოსავლის მოსაძებნად სხვადასხვა მხარესთან იმუშავებს.

„ცხადი იყო, რომ ამ შეთანხმებამდე უნდა მივიდეთ, თუმცა დარწმუნებული ვარ, რომ ამას ჩვენს ამერიკელ პარტნიორებთან თანამშრომლობით შევძლებთ“, — განაცხადა მან.