აშშ-ის პრეზიდენტ დონალდ ტრამპის ადმინისტრაცია ამტკიცებს, რომ თურქეთი ამჟამად არ აკმაყოფილებს შეერთებული შტატებისგან F-35 ავიაგამანადგურებლების შესაძენად აუცილებელ კრიტერიუმებს.

აშშ-ის სახელმწიფო დეპარტამენტმა ამის შესახებ რესპუბლიკელი წარმომადგენლის უესლი ბელისთვის ამ კვირის დასაწყისში გაგზავნილ წერილში განაცხადა. ბელმა თეთრ სახლს ამ საკითხის შესახებ ინფორმაციის მისაღებად მას შემდეგ მიმართა, რაც ტრამპმა ივლისის დასაწყისში თურქეთის პრეზიდენტ რეჯეფ თაიფ ერდოღანთან შეხვედრის დროს მიანიშნა, რომ მზად იყო, მხარი დაეჭირა სტამბოლისთვის F-35-ების მიყიდვისთვის, რაც დიდი ხნის განმავლობაში შეჩერებული იყო. 

თურქეთი შეერთებული შტატებისგან F-35 ავიაგამანადგურებლების შესაძენად მრავალეროვნულ პროგრამას შეუერთდა, თუმცა 2020 წელს რუსული S-400 საჰაერო თავდაცვის სისტემების შეძენის გამო ის პროგრამიდან ამოიღეს.

S-400-ის შეძენამ, „ამერიკის მოწინააღმდეგეებთან სანქციების გზით ბრძოლის აქტის“ ფარგლებში, აშშ-ის მიერ თურქეთის წინააღმდეგ სანქციების დაწესება გამოიწვია. მიუხედავად იმისა, რომ ტრამპმა ერდოღანთან 7 ივლისს შეხვედრაზე განაცხადა, რომ ამ სანქციებს გააუქმებდა, სახელმწიფო დეპარტამენტის წერილი მიუთითებს, რომ ეს ჯერ არ მომხდარა.

„ჩვენი პოლიტიკა თურქეთის მიერ F-35-ების შესყიდვასთან დაკავშირებით უცვლელი რჩება და სრულად შეესაბამება „ამერიკის მოწინააღმდეგეებთან სანქციების გზით ბრძოლის აქტის“ 231-ე მუხლს და 2020 ფისკალური წლის ეროვნული თავდაცვის ავტორიზაციის აქტის 1245-ე მუხლს.

ეს მოიცავს S-400-ის საკითხის მოგვარებას თურქეთის მიერ სისტემის, ან მასთან დაკავშირებული აღჭურვილობის აღარ ქონით, მომავალში მისი შეძენის წინააღმდეგ გარანტიების გაცემითა და სხვა, კანონით გათვალისწინებული სერტიფიცირების მოთხოვნების დაკმაყოფილებით. თურქეთს ჯერ არ შეუსრულებია ეს პირობები“, - ნათქვამია ბელისთვის გაგზავნილ წერილში.

აშშ-თან F-35-ების საკითხის მოგვარების ფარგლებში, თურქეთი ვაშინგტონთან S-400 სისტემის გაყიდვაზე მოლაპარაკებებს აწარმოებდა. თუმცა წერილში მითითებულია, რომ ასეთი გადაცემა ჯერ არ განხორციელებულა.