აშშ-ის პრეზიდენტმა დონალდ ტრამპმა განაცხადა, რომ აშშ და კუბა შეთანხმებას მიაღწევენ და აღნიშნა, რომ სამხედრო ქმედების საჭიროებას ვერ ხედავს.

„ვიტყოდი, რომ ჩვენ და კუბა შეთანხმებას მივაღწევთ. არ მგონია, სამხედრო ძალა დაგვჭირდეს. გვსურს, კუბას დავეხმაროთ. გვსურს, კუბა ჩვენი ხალხისთვის გავხსნათ“, — განუცხადა ტრამპმა ჟურნალისტებს თეთრ სახლში.

22 სექტემბერს გაეროს გენერალურ ასამბლეაზე სიტყვით გამოსვლისას ტრამპმა კუბას „წარუმატებელი სახელმწიფო“ უწოდა და განაცხადა, რომ კუნძულოვან ქვეყანას „თავისუფლება ელის“. ტრამპის გამოსვლის დროს კუბის დელეგაციამ დარბაზი დატოვა.

კუბის საგარეო საქმეთა მინისტრმა ბრუნო როდრიგესმა მოგვიანებით გაეროში განაცხადა, რომ კუბა ყოველთვის მზად იქნება შეერთებულ შტატებთან დიალოგისთვის.

„ჩვენ მზად ვართ აშშ-ის კომპანიებთან კომერციული და საქმიანი ურთიერთობებისთვის, ისევე, როგორც ნებისმიერ სხვა ქვეყანასთან“, — განაცხადა როდრიგესმა და, ამავდროულად, მკაცრად დაგმო კუბის წინააღმდეგ აშშ-ის მიერ დაწესებული სავაჭრო ემბარგო.