უკრაინის დამოუკიდებლობის დღის აღსანიშნავად კიევში გაერთიანებული სამეფოს, ესტონეთის, ლუქსემბურგის, მოლდოვის სახელმწიფოებისა და მთავრობების მეთაურები და ევროპული საბჭოს პრეზიდენტი ანტონიო კოშტა ჩავიდნენ. ამის შესახებ უკრაინის საგარეო საქმეთა მინისტრმა ანდრეი სიბიგამ სოციალურ ქსელში განაცხადა.

სიბიგა დედაქალაქის რკინიგზის სადგურზე მოლდოვისა და ესტონეთის პრეზიდენტებს - მაია სანდუსა და ალარ კარისს, ლუქსემბურგის პრემიერ-მინისტრს ლუქს ფრიდენს და ევროპული საბჭოს პრეზიდენტს ანტონიო კოშტას დახვდა.

კიევში ასევე ჩავიდა დიდი ბრიტანეთის ახალი პრემიერ-მინისტრი ენდი ბერნჰემი. ეს მისი პირველი საერთაშორისო ვიზიტია პრემიერ-მინისტრის რანგში.

ლიდერები უკრაინაში ჩავიდნენ, რათა მონაწილეობა მიიღონ უკრაინის დამოუკიდებლობის აღდგენის 35-ე წლისთავისადმი მიძღვნილ ღონისძიებებში.

„უკრაინისთვის დამოუკიდებლობა აბსტრაქტული იდეა არ არის. ჩვენ ის ყველა სირთულის მიუხედავად დავიცავით. ასეთ დროს ერები აცნობიერებენ, თუ რამდენად მნიშვნელოვანია მოკავშირეების გვერდით ყოლა. დღეს კი ჩვენ ზუსტად ვიცით, ვინ არიან ჩვენი ნამდვილი მეგობრები“, - წერს უკრაინის საგარეო საქმეთა მინისტრი X-ზე.

ამასთან, გავრცელდა ინფორმაცია, რომ აშშ-ის პრეზიდენტის სპეციალური წარმომადგენლების სტივ უიტკოფისა და ჯარედ კუშნერის უკრაინაში ვიზიტი გადაიდო. მოსალოდნელი იყო, რომ ისინი კიევს სწორედ დამოუკიდებლობის დღეს ეწვეოდნენ. 

This morning at the Kyiv Railway Station, we were pleased to greet our allies who are joining us to celebrate 35 years since Ukraine restored independence.

Welcome to Kyiv, 🇪🇺@eucopresident, 🇬🇧@andyburnham, 🇱🇺@LucFrieden, 🇲🇩@sandumaiamd, 🇪🇪@AlarKaris!

For Ukraine, independence… pic.twitter.com/K9i9644wUU

— Andrii Sybiha 🇺🇦 (@andrii_sybiha) August 24, 2026