აშშ-ის თავდაცვის მდივანი პიტ ჰეგსეთი უკრაინის თავდაცვის საკონტაქტო ჯგუფის („რამშტაინის“ ფორმატის) მომდევნო შეხვედრას არ დაესწრება, რომელიც 11 აპრილს გაიმართება. ამის შესახებ Defence News ევროპელ და ამერიკელ წყაროებზე დაყრდნობით იუწყება.  

Defense News-ის ცნობით, ჰეგსეთი არ შეუერთდება „რამშტაინის“ შეხვედრას არც პირადად და არც დისტანციურად, ვიდეობმულის მეშვეობით.  ასევე მოსალოდნელია, რომ პენტაგონი შეხვედრაზე მაღალჩინოსნებს, ან სხვა წარმომადგენლებს არ გაგზავნის.

„აშშ ჯერ კიდევ აფასებს, თუ როგორ მიიღებენ მონაწილეობას მისი წარმომადგენლები უკრაინის მხარდასაჭერად სხვადასხვა ფორმატში, განსაკუთრებით სამხედრო დახმარებასთან დაკავშირებულ ფორმატში“, - განუცხადა Defence News-ს ამერიკელმა ოფიციალურმა წარმომადგენელმა.

როგორც მედია წერს, უკრაინის თავდაცვის საკითხებზე საკონტაქტო ჯგუფის მომდევნო შეხვედრა შესაძლოა, პირველი გახდეს, რომელშიც აშშ მონაწილეობას არ მიიღებს.

უკრაინის საკითხზე „რამშტაინის“ ჯგუფის მომდევნო შეხვედრა 11 აპრილსაა დაგეგმილი. შეხვედრა ბრიუსელში, ნატოს შტაბ-ბინაში გაიმართება, თანათავმჯდომარეები კი დიდი ბრიტანეთი და გერმანია იქნებიან.