„ჩვენ ტრამპს მოვკლავთ“ - ირანში ტრამპის მკვლელობის მუქარის შემცველი ბანერები გამოფინეს
თეირანის ქუჩებში დონალდ ტრამპის მკვლელობის მუქარის შემცველი ბანერები გამოფინეს.
„ჩვენ ტრამპს მოვკლავთ“, - წერია უზარმაზარ ბილბორდზე, რომელიც თეირანის ხალხმრავალ ენგელაბის მოედანზეა განთავსებული და მასზე გამოსახულია აშშ-ის პრეზიდენტი გისოსებს მიღმა, თავდახრილი.
ახლომდებარე კიდევ ერთ ბილბორდზე გამოსახულია ტრამპი აშშ-ის ვიცე-პრეზიდენტ ჯ.დ. ვენსთან, სპეციალურ წარმომადგენელ სტივ ვიტკოფთან და ისრაელის პრემიერ-მინისტრ ბენიამინ ნეთანიაჰუსთან ერთად, სისხლიანი სახეებითა და დახეული კოსტიუმებით, ფონზე აშშ-ისა და ისრაელის გაცვეთილი დროშებია გამოსახული.
ათობით ადამიანი შეიკრიბა მოედანზე, აფრიალებენ წითელ დროშებს და ხელში უჭირავთ ბანერები წარწერით: „სისხლი დაიღვრება“.
ამავდროულად, აქციის მონაწილეები მოკლული უზენაესი ლიდერის, აიათოლა ალი ხამენეის მკვლელობისთვის შურისძიებას მოითხოვენ, რომელიც 28 თებერვალს, ომის დაწყებისას, აშშ-ისა და ისრაელის თავდასხმებს ემსხვერპლა.
