ჩეხეთის პრეზიდენტის პეტრ პაველის განცხადებით, რუსეთის პოზიციის გამო, უკრაინაში ომის დასრულების შესახებ შეთანხმების მიღწევა მოკლევადიან პერსპექტივაში ნაკლებად სავარაუდოა. ამის შესახებ მან Odkryto-სთან ინტერვიუში განაცხადა.

„თუ ვინმეს მოლოდინი ჰქონდა, რომ უკრაინას, ევროპის ქვეყნებს, აშშ-სა და რუსეთს შორის შეთანხმების მიღწევა მოკლევადიან პერსპექტივაში შესაძლებელი იქნებოდა, ეს ნამდვილად გულუბრყვილობას წარმოადგენდა. ფაქტი, რომ უკრაინის, ევროპისა და აშშ-ის პოზიციები დაახლოვდა უკვე დიდი წარმატებაა“, - აცხადებს პეტრ პაველი. 

მისივე თქმით, რუსეთს კომპრომისზე წასვლის მზადყოფნა ჯერ არ გამოუვლენია. 

„ამის შესაცვლელად, უკრაინის მოკავშირეებმა მოსკოვზე ზეწოლა უნდა მოახდინონ“, - აცხადებს ჩეხეთის პრეზიდენტი. 

შეგახსენებთ, გასულ კვირას აშშ-ის პრეზიდენტმა დონალდ ტრამპმა რუსეთის სამშვიდობო შეთანხმების დადების მზადყოფნის შესახებ განაცხადა და უკრაინის პრეზიდენტ ვოლოდიმირ ზელენსკის მოუწოდა „იმოქმედოს“.

16 თებერვალს, უკრაინის დელეგაცია ჟენევაში გაემგზავრა, სადაც 17-18 თებერვალს შეერთებულ შტატებთან და რუსეთთან მოლაპარაკებები იგეგმება. 

უკრაინის პრეზიდენტმა ვოლოდიმირ ზელენსკიმ იმედი გამოთქვა, რომ აშშ-სა და რუსეთს შორის ომის შესაძლო დასრულების შესახებ მოლაპარაკებების პროცესი არ შეფერხდება.