ჩეხეთის პრემიერ-მინისტრი, პეტრ პაველი გრენლანდიასთან დაკავშირებით აშშ-ის პრეზიდენტის, დონალდ ტრამპის განცხადებას გამოეხმაურა და აღნიშნა, რომ „გრენლანდია დანიის ნაწილია და საერთაშორისო სამართალი დაცული უნდა იყოს“. მის განცხადებას Radio Prague International ციტირებს.

მისი თქმით, ერთადერთი საკითხი რაზეც შეერთებულ შტატებს შეუძლია გრენლანდიას ესაუბროს, ეს არის ამერიკული ჯარების გაფართოება. 

პრემიერის თქმით, კლიმატის ცვლილების გამო ეს ტერიტორია სულ უფრო მნიშვნელოვანი ხდება არქტიკული ახალი მარშრუტების გახსნის კუთხით.

„ამ ყველაფრის დეტალურად შეფასება არ შემიძლია, მაგრამ ვფიქრობ, რომ სტრატეგიული მნიშვნელობა იზრდება, განსაკუთრებით იმ სახელმწიფოებისთვის, რომლებიც ცდილობენ უფრო მეტად დაიცვან თავიანთი ინტერესები არქტიკულ სივრცეში“, - განაცხადა ჩეხეთის პრემიერმა. 

დონალდ ტრამპი აცხადებს, რომ შეერთებული შტატები გრენლანდიას 100%-ით მიიღებს. ამის შესახებ მან NBC News-თან ინტერვიუში ისაუბრა. 

ეს განცხადება დონალდ ტრამპმა მას შემდეგ გააკეთა, რაც ვიცე-პრეზიდენტი, მეუღლესთან ერთად, ვიზიტით გრენლანდიაში იმყოფებოდა, სადაც ამერიკული ბაზა მოინახულა.

შეკითხვაზე, – რა სიგნალს გაუგზავნის გრენლანდიის მიღება რუსეთს და დანარჩენ მსოფლიოს? – დონალდ ტრამპმა თქვა:

„ამაზე არ ვფიქრობ. სინამდვილეში, ეს არ მადარდებს. გრენლანდია არის ძალიან განცალკევებული საკითხი, ძალიან განსხვავებული. ეს არის საერთაშორისო მშვიდობა. ეს არის საერთაშორისო უსაფრთხოება და სიძლიერე. თქვენ გაქვთ ხომალდები, რომლებიც დაცურავენ გრენლანდიის გასწვრივ რუსეთიდან, ჩინეთიდან და მრავალი სხვა ადგილიდან. ჩვენ არ დავუშვებთ, რომ მოხდეს ისეთი რამ, რაც დააზარალებს მსოფლიოს ან შეერთებულ შტატებს“, – თქვა ტრამპმა.