აშშ-ის სახელმწიფო მდივანმა მარკო რუბიომ განაცხადა, რომ 66 საერთაშორისო ორგანიზაციიდან გასვლის გადაწყვეტილება მიღებული იქნა იმის გამო, რომ ეს სტრუქტურები არაეფექტური გახდა.

რუბიომ აღნიშნა, რომ შეერთებულმა შტატებმა ცენტრალური როლი ითამაშა საერთაშორისო წესრიგის ჩამოყალიბებაში და ამერიკის ლიდერობა „უდავოა“.

„ლიდერობა მოითხოვს რთულ გადაწყვეტილებებს და იმის ამოცნობის უნარს, თუ როდის ხდებიან მშვიდობის, კეთილდღეობისა და თავისუფლების ხელშეწყობის მიზნით შექმნილი ინსტიტუტები ამ მიზნების მიღწევის დაბრკოლებები“, - აღნიშნა მან.

მისი თქმით, ის ორგანიზაციებიც კი, რომლებიც „ოდესღაც სასარგებლო ფუნქციებს ასრულებდნენ“, სულ უფრო მეტად იქცევიან „არაეფექტურ ბიუროკრატიულ სტრუქტურებად, პოლიტიზებული აქტივიზმის პლატფორმებად ან ინსტრუმენტებად, რომლებიც ეწინააღმდეგება ჩვენი ქვეყნის ინტერესებს“.

„ეს ინსტიტუტები არა მხოლოდ ვერ ახერხებენ შედეგების მიღწევას, არამედ ხელს უშლიან მათ ქმედებებს, ვისაც ამ პრობლემების გადაჭრა სურს. საერთაშორისო ბიუროკრატიული სტრუქტურებისთვის ცარიელი ჩეკების გაცემის ეპოქა დასრულდა“, - ხაზგასმით აღნიშნა სახელმწიფო მდივანმა.

მან დასძინა, რომ დონალდ ტრამპის ადმინისტრაციის მიერ ჩატარებული ანალიზის დროს ის 66 ორგანიზაცია, საიდანაც შეერთებულმა შტატებმა გასვლა გადაწყვიტა, „არაეფექტური, არასაჭირო და მავნე“ აღმოჩნდა.

„ჩვენი მუდმივი მონაწილეობა ორგანიზაციებში, რომლებიც არ ასახავს ჩვენს ღირებულებებს და არ ემსახურება ჩვენს ინტერესებს, ჩვენი ეროვნული მოვალეობის ღალატი იქნება“, - აღნიშნა რუბიომ.

ამავდროულად, მან დასძინა, რომ ეს გადაწყვეტილება არ ნიშნავს იმას, რომ „ამერიკა ზურგს აქცევს მსოფლიოს“.

მან აღნიშნა, რომ ტრამპის ადმინისტრაცია რეალურ შედეგებს მოითხოვს იმ ინსტიტუტებისგან, რომლებსაც აშშ აფინანსებს და რომლებშიც მონაწილეობს.