იაპონიაში ძლიერი ტაიფუნისთვის ემზადებიან. „დუჯუანი“ ტოკიოსა და ქვეყნის აღმოსავლეთ სანაპიროს მიმდებარე რაიონებს უახლოვდება. არსებობს მეწყრებისა და წყალდიდობების საფრთხე. წერს BBC.

როგორც მედია წერს, ამ დროისთვის 200-ზე მეტი რეისი გაუქმდა და  მატარებლის მოძრაობა შეჩერებულია. ტაიფუნის გამო ხუთ პრეფექტურაში 1.6 მილიონზე მეტ ადამიანს ევაკუაციისკენ მოუწოდეს.

იაპონიის შინაგან საქმეთა სამინისტროს მონაცემებით, ევაკუაციის განკარგულება ეხება 1 674 084 ადამიანს იბარაკის, ჩიბას, ტოკიოს, კანაგავასა და შიზუოკის პრეფექტურებში. ამასთან, ევაკუაცია სავალდებულო არ არის.

ქარიშხალმა ელექტროენერგიის მიწოდების შეფერხება გამოიწვია, მათ შორის, კანტოს რეგიონში, სადაც დაახლოებით 4 000 ოჯახს ელექტროენერგია არ მიეწოდება.

იაპონიის მეტეოროლოგიურმა სააგენტომ ქალაქ ოშიმასა და იზუს კუნძულების ნაწილში, რომლებიც ტოკიოს სამხრეთით მდებარეობს, მეხუთე - უმაღლესი - დონის საგანგებო გაფრთხილება გასცა წყალდიდობისა და მეწყრების საფრთხის გამო.