რუსეთში, ბაშკირეთის რეგიონის ქალაქ სტერლიტამაკის ნავთობქიმიურ ქარხანაში აფეთქება მოხდა. ამის შესახებ Deutche Welle იუწყება.

საქალაქო ადმინისტრაციის უფროსის, ემილ შაიმარდანოვის ცნობით, აფეთქება წყლის ფილტრაციის საამქროში მოხდა.

„საამქროში 5 ადამიანი მუშაობდა. არავინ დაშავებულა“, - განაცხადა შაიმარდანოვმა.

მოგვიანებით ბაშკირეთის ხელმძღვანელმა რადი ხაბიროვმა განაცხადა, რომ სტერლიტამაკის სამრეწველო კომპლექსზე ორი უპილოტო საფრენი აპარატით შეტევები განხორციელდა. მისი ინფორმაციით, დრონები განადგურებულები იყო და მათი ნამსხვრევები ერთ-ერთი საამქროს ტერიტორიაზე ჩამოვარდა.

გასულ ღამეს ნიჟნი ნოვგოროდის ოლქში უკრაინული დრონების იერიშის მოგერიებისას 9-დან 12 აფეთქებამდე მოხდა. უკრაინული მედიის ცნობით, შეტევები „ლუკოილის“ ერთ-ერთ საწარმოზე განხორციელდა.

კურსკის ოლქში ქალაქ რილსკის ქვესადგურზე დრონებით იერიშის დროს 16 ათასი აბონენტი ელექტროენერგიის გარეშე დარჩა.