აშშ-ში დაფუძნებულმა საინფორმაციო ორგანიზაციამ „ალ-მონიტორმა“ დაადასტურა ერაყის დედაქალაქ ბაღდადში ამერიკელი ჟურნალისტის შელი კიტლსონის გატაცების ფაქტი და მისი „უსაფრთხო და დაუყოვნებლივ გათავისუფლება“ მოითხოვა.

„ალ-მონიტორმა“ განაცხადა, რომ „ღრმად შეშფოთებულია“ კიტლსონის გატაცებით, რომელიც საინფორმაციო სააგენტოსთან თანამშრომლობს. 

„ჩვენ მოვითხოვთ მის უსაფრთხო და დაუყოვნებლივ გათავისუფლებას. ჩვენ მხარს ვუჭერთ მის მიერ რეგიონიდან მნიშვნელოვანი რეპორტაჟების მიწოდებას და მოვუწოდებთ მის სწრაფ დაბრუნებას, რათა გააგრძელოს მისი მნიშვნელოვანი საქმიანობა“, - ნათქვამია განცხადებაში.

ერაყის შინაგან საქმეთა სამინისტრომ მანამდე გაავრცელა განცხადება, რომ 31 მარტის საღამოს უცნობმა პირებმა ბაღდადის ცენტრში უცხოელი ჟურნალისტი ქალი გაიტაცეს და რომ უსაფრთხოების ძალებმა დაიწყეს ოპერაცია პასუხისმგებელი პირების დასაკავებლად და მისი გათავისუფლების უზრუნველსაყოფად.

შინაგან საქმეთა სამინისტროს ორმა წარმომადგენელმა CNN-ს ანონიმურობის პირობით განუცხადა, რომ გატაცებული ჟურნალისტი კიტლსონი იყო.

აშშ-ის ოფიციალურმა წარმომადგენელმა CNN-ს განუცხადა, რომ ჟურნალისტის გათავისუფლების უზრუნველსაყოფად ერაყთან თანამშრომლობენ.

სახელმწიფო დეპარტამენტის წარმომადგენელმა განაცხადა, რომ ისინი „(ყურადღებით) აკვირდებიან ამ ცნობებს“. „ტრამპის ადმინისტრაციას ამერიკელების უსაფრთხოებაზე მაღალი პრიორიტეტი არ აქვს“, - განაცხადა სახელმწიფო დეპარტამენტის წარმომადგენელმა.

„ალ-მონიტორის“ ცნობით, კიტლსონი ახლო აღმოსავლეთისა და ავღანეთის საკითხებზე სპეციალიზებული ჟურნალისტია, რომლის ნაშრომებიც გამოქვეყნებულია საერთაშორისო, ამერიკულ და იტალიურ გამოცემებში.