Axios: თეთრი სახლი მიიჩნევს, რომ ევროპა ძირს უთხრის ტრამპის სამშვიდობო ძალისხმევას უკრაინაში, ისინი უკრაინას უბიძგებენ, რუსეთისგან არარეალისტური ტერიტორიული დათმობები მოითხოვოს
თეთრი სახლის მაღალი თანამდებობის პირები მოთმინებას კარგავენ ევროპელი ლიდერების მიმართ, რომლებიც უკრაინის პრეზიდენტ ვოლოდიმირ ზელენსკის უბიძგებენ, რუსეთისგან არარეალისტური ტერიტორიული დათმობები მოითხოვოს, რითაც ძირს უთხრიან აშშ-ის პრეზიდენტ დონალდ ტრამპის მშვიდობისკენ სწრაფვას, - ამის შესახებ Axios-ი საკუთარ წყაროებზე დაყრდნობით იტყობინება.
როგორს მედია წერს, აშშ-ის პრეზიდენტ დონალდ ტრამპისა და რუსეთის ლიდერის ალასკაში გამართული სამიტიდან ორი კვირის შემდეგ, უკრაინის გარშემო სამშვიდობო ძალისხმევის მხრივ ხელშესახები პროგრესი არ შეინიშნება და ტრამპის თანაშემწეები მიიჩნევენ, რომ ამაში არც ამერიკის პრეზიდენტი და არც მოსკოვი არ არიან დამნაშავე.
Axios-ის ცნობით, თეთრი სახლის მაღალი თანამდებობის პირები მიიჩნევენ, რომ ზოგიერთი ევროპელი ლიდერი მხოლოდ სიტყვიერად უჭერს მხარს ტრამპის სამშვიდობო ძალისხმევას, სინამდვილეში კი ცდილობენ „ძირი გამოუთხარონ იმ პროგრესს“, რომელიც ალასკაში შეხვედრის შემდეგ მიღწეულია.
ტრამპის გარემოცვა მიიჩნევს, რომ სწორედ ევროპელი ლიდერები უბიძგებენ უკრაინას ტერიტორიულ საკითხებთან დაკავშირებით შეურიგებლობისკენ და მოუწოდებენ ზელენსკის, დაელოდოს დროს „უკეთესი გარიგებისთვის“, ხოლო მათი როლის გარეშე კიევის პოზიცია განსხვავებული იქნებოდა.
„ევროპელებს არ შეუძლიათ ამ ომის გაჭიანურება და ფარულად წამოაყენონ გაუმართლებელი მოლოდინები, თანაც ისე, რომ ამერიკამ გასწიოს ხარჯი“, - განაცხადა თეთრი სახლის მაღალჩინოსანმა ანონიმურობის დაცვით.
მან დასძინა, რომ „თუ ევროპას ამ ომში ესკალაცია სურს, ეს მათი საქმეა“.
ერთ-ერთმა თანამოსაუბრემ განაცხადა, რომ „ზოგიერთი ევროპელი აგრძელებს ზღაპრებში ცხოვრებას და უგულებელყოფს იმ ფაქტს, რომ ტანგოს დასაკრავად ორი ადამიანია საჭირო“.
თეთრი სახლის წარმომადგენლები ბრიტანეთისა და საფრანგეთის პოზიციას მეტ-ნაკლებად კონსტრუქციულად მიიჩნევენ, თუმცა ჩივიან, რომ სხვა მსხვილ ევროპულ ქვეყნებს „სურთ, რომ ომის სრული სიმძიმე აშშ-მ აიღოს თავზე“ და თავად არ არიან მზად აქტიური მონაწილეობისთვის.
