ირანმა შეერთებულ შტატებს ომის დასრულების შესახებ შეთანხმებისთვის განახლებული წინადადება წარუდგინა, თუმცა თეთრი სახლი მიიჩნევს, რომ ეს არ არის მნიშვნელოვანი წინგადადგმული ნაბიჯი და არ არის საკმარისი საბოლოო შეთანხმების მისაღწევად. ამის შესახებ გამოცემა Axios-ს აშშ-ის მაღალჩინოსანმა და საკითხთან დაკავშირებულმა წყარომ განუცხადა. 

აშშ-ის ოფიციალური პირები აცხადებენ, რომ პრეზიდენტ ტრამპს ომის დასრულებაზე შეთანხმების მიღწევა სურს, თუმცა საბრძოლო მოქმედებების განახლებას განიხილავს, რადგან ირანმა მისი მრავალი მოთხოვნა უარყო და ბირთვულ პროგრამასთან დაკავშირებით მნიშვნელოვან დათმობებზე წასვლაზე უარი თქვა.

აშშ-ის მაღალჩინოსანმა აღნიშნა, რომ ირანის საპასუხო წინადადება, რომელიც აშშ-ს 17 მაისის საღამოს პაკისტანელი შუამავლების მეშვეობით გადაეცა, წინა ვერსიასთან შედარებით მხოლოდ სიმბოლურ გაუმჯობესებებს შეიცავს.

„ჩვენ ნამდვილად ვერ მივაღწიეთ დიდ პროგრესს. დღეს ძალიან სერიოზულ სიტუაციაში ვართ. მათზე ზეწოლა ხორციელდება, რომ სწორი რეაგირება მოახდინონ“, - განაცხადა აშშ-ის მაღალჩინოსანმა.

ოფიციალურმა პირმა აღნიშნა, რომ შეერთებული შტატები და ირანი შეთანხმების არსზე პირდაპირ მოლაპარაკებებს არ აწარმოებენ, თუმცა ჩართულნი არიან არაპირდაპირ მოლაპარაკებებში, რათა შეეცადონ, მიაღწიონ კონსენსუსს იმის შესახებ, თუ როგორი იქნება ეს მოლაპარაკებები.

აშშ-ის ორი ოფიციალური პირის ცნობით, ტრამპი ხვალ, 19 მაისს, სიტუაციურ ოთახში ეროვნული უსაფრთხოების გუნდს შეკრებს, რათა სამხედრო ვარიანტები განიხილოს. 

აშშ-ის მაღალჩინოსანმა განაცხადა, რომ თუ ირანი პოზიციას არ შეცვლის, აშშ-ს მოლაპარაკებების გაგრძელება „ბომბებით“ მოუწევს.