ამერიკელი სამხედროები ირანში პოტენციური სამხედრო ოპერაციისთვის ემზადებიან, რომელმაც, შესაძლოა, რამდენიმე კვირა გასტანოს. ინფორმაციას Reuters ორ ამერიკელ მაღალჩინოსანზე დაყრდნობით ავრცელებს.

სააგენტოს ცნობით, სამხედრო ოპერაცია დაიწყება მაშინ, თუ აშშ-ის პრეზიდენტი დონალდ ტრამპი ამის ბრძანებას გასცემს. ეს, შესაძლოა, ირანთან ყველაზე სერიოზული სამხედრო დაპირისპირება აღმოჩნდეს.

როგორც ამერიკელი ოფიციალური პირები ამბობენ, აღნიშნული გარემოება აშშ-სა და ირანს შორის დიპლომატიური მოლაპარაკებების ფსონს ზრდის.

მანამდე, ამერიკულმა მხარემ გაავრცელა ინფორმაცია, რომ პენტაგონი ახლო აღმოსავლეთში ახალ ავიამზიდს აგზავნის, რომლის ბორტზე ათასობით ჯარისკაცი, გამანადგურებლები, მართვადი რაკეტებია.

Reuters-ის ცნობით, პარასკევს, 13 თებერვალს ჩრდილოეთ კაროლინის სამხედრო ბაზაზე სამხედროებთან შეხვედრის დროს ტრამპმა განაცხადა: „ირანთან შეთანხმების დადება რთული იქნებოდა“.

„ხანდახან საჭიროა გეშინოდეს. მხოლოდ მაშინ შეძლებ ვითარების დალაგებას“, - აღნიშნა ტრამპმა.

სააგენტომ შესაძლო სამხედრო ოპერაციისთვის მზადების შესახებ კითხვით თეთრ სახლს მიმართა. თეთრი სახლის პრესმდივანმა, ანა კელიმ განაცხადა: „პრეზიდენტი ტრამპი ირანთან მიმართებით მოქმედებების ყველა ვარიანტს განიხილავს“.