იტალიის პრემიერ-მინისტრმა ჯორჯია მელონიმ განაცხადა, რომ „არ სჯერა“ გრენლანდიაში აშშ-ის სამხედრო მოქმედების შესაძლებლობის. იტყობინება ANSA.

პრესკონფერენციის დროს მელონიმ გამორიცხა გრენლანდიის ძალისმიერი მიტაცების შესაძლებლობა შეერთებული შტატების მიერ და დასძინა, რომ ასეთი სცენარი თავად აშშ-ის პრეზიდენტ დონალდ ტრამპის ადმინისტრაციამ უარყო.

იტალიის პრემიერ-მინისტრმა აღნიშნა, რომ კუნძულზე სამხედრო მოქმედებები არავისთვის, მათ შორის შეერთებული შტატებისთვისაც, სასარგებლო არ არის.

 მჯერა, ტრამპის ადმინისტრაცია, თავისი ძალიან აგრესიული მეთოდებით, ყურადღებას ამახვილებს გრენლანდიის სტრატეგიულ მნიშვნელობაზე მისი ინტერესებისა და უსაფრთხოებისთვის. ეს არის რეგიონი, სადაც ბევრი უცხოელი მოთამაშე მოქმედებს და მე მჯერა, რომ აშშ-ის გზავნილი არის ის, რომ ისინი არ შეეგუებიან მათი მხრიდან ზედმეტ ჩარევას“, - განაცხადა იტალიის მთავრობის მეთაურმა.

მელონიმ დასძინა, რომ არქტიკის რეგიონში, მათ შორის გრენლანდიაში, ნატოს „სერიოზული და მნიშვნელოვანი“ ყოფნაა საჭირო, ამიტომ ალიანსმა ამ საკითხზე „სერიოზული დებატები“ უნდა დაიწყოს.