უკრაინის ჯარები აგრძელებენ ბრძოლას რუსეთის ტერიტორიაზე, კერძოდ ბელგოროდის ოლქში. რუსი სამხედრო ბლოგერების თქმით, შეტაკებები გრძელდება და დასავლელი ანალიტიკოსები ამტკიცებენ, რომ უკრაინა რამდენიმე კილომეტრით დაწინაურდა, - წერს Reuters.

როგორც გამოცემა წერს, რამდენიმე რუსი სამხედრო კორესპონდენტი აცხადებდა, რომ უკრაინული ქვედანაყოფები ბელგოროდის რეგიონში იმყოფებოდნენ და რუს ჯარებთან იბრძოდნენ. ამასთან, არც კიევი და არც მოსკოვი ამ ინფორმაციას ოფიციალურად არ ადასტურებენ. რუსეთის თავდაცვის სამინისტრომ ადრე განაცხადა, რომ მისმა ჯარებმა მოიგერიეს უკრაინული ძალების რამდენიმე მცდელობა ბელგოროდის რეგიონში საზღვრის გარღვევისას.

უკრაინის შეიარაღებული ძალები ამ მოვლენებზე კომენტარისგან თავს იკავებს, რაც შესაძლოა ოპერატიული უსაფრთხოების საკითხებით იყოს განპირობებული. ამავდროულად, პრეზიდენტმა ვოლოდიმირ ზელენსკიმ კიევში გამართულ პრესკონფერენციაზე აღნიშნა, რომ უკრაინის არმიამ „გარკვეული ნაბიჯები“ გადადგა კურსკის ოლქის გარეთ უკრაინის პოზიციებზე ზეწოლის შესამცირებლად.

უკრაინის ეროვნული უშიშროებისა და თავდაცვის საბჭოს წარმომადგენელი, ანდრეი კოვალენკო, ვარაუდობს, რომ უკრაინული ძალები, შესაძლოა, მოქმედებდნენ ბელგოროდის რეგიონში.

რუსული სამხედრო ბლოგი Rybar, რომელსაც 1.3 მილიონზე მეტი გამომწერი ჰყავს, იტყობინება სასტიკი ბრძოლების შესახებ სოფელ პოპოვკაში, სადაც ორივე მხარე აქტიურად იყენებს უპილოტო თვითმფრინავებს თავდასხმისთვის.

ანალიტიკოსების აზრით, უკრაინული ძალების ოპერაცია შესაძლოა მიმართული იყოს რუსული ჯარების ყურადღების გადატანაზე, რომლებიც კურსკის რეგიონში აქტიურ საბრძოლო მოქმედებებს აწარმოებენ.

ფინელი სამხედრო ანალიტიკოსი ემილ კასტჰელმი  მიიჩნევს, რომ უკრაინელმა ჯარებმა შეძლეს რუსეთის პირველი თავდაცვის ხაზების გარღვევა და რუსეთის ტერიტორიაზე 3-4 კმ სიღრმეზე წინსვლა.

„უკრაინელებს თეორიულად შეეძლოთ კიდევ რამდენიმე სოფლის აღება სასაზღვრო ზონიდან, მაგრამ ეს არ არის გარღვევა - ეს იქნება მცირე ტაქტიკური წარმატება“, - აცხადებენ ანალიტიკოსები.