რუსეთი აგრძელებს შეტევით ოპერაციებს უკრაინაში და დასავლელი ლიდერები ეძებენ გზებს კონფლიქტის დასასრულებლად, -  იუწყება The Wall Street Journal.

როგორც მედია წერს, უკრაინა რთული ზამთრისთვის ემზადება დასავლეთიდან იარაღის შეზღუდული და ნელი მიწოდების გამო. არმია თანდათან კარგავს ადგილს მთავარ აღმოსავლეთ ფრონტზე. უკრაინელი სამხედროების თქმით, მათი სტრატეგია არის რუსეთისთვის მაქსიმალური დანაკარგის მიყენება საკუთარი ძალების შენარჩუნებით. თუმცა, უკრაინის ერთ-ერთი ოფიციალური წარმომადგენლის თქმით, სიტუაცია გულდასაწყვეტად გამოიყურება, რადგან ახლოვდება „პირქუში ზამთარი“.

გაზეთი წერს, რომ რუსული სარაკეტო თავდასხმები უკრაინის ენერგეტიკულ ინფრასტრუქტურაზე აუარესებს სიტუაციას, რამაც გამოიწვია ელექტროენერგიის გათიშვა მთელ ქვეყანაში, ვითარება ზამთარში შეიძლება კიდევ უფრო გამწვავდეს. უკრაინული ძალები აგრძელებენ ბრძოლას, თუმცა, რუსეთმა ცოტა ხნის წინ აიღო ქალაქი უგლედარი და პოკროვსკისკენ დაიძრა, რამაც უკრაინელი სამხედროების შეშფოთება გამოიწვია.

აშშ-ის პრეზიდენტმა ჯო ბაიდენმა და სხვა დასავლელმა ლიდერებმა არაერთხელ გამოაცხადეს მხარდაჭერა უკრაინის მიმართ, მაგრამ დახმარების დონე კიევს არ აძლევს საშუალებას შეაჩეროს რუსეთი და შეცვალოს ომის ტალღა. როგორც უკრაინის ერთ-ერთმა მაღალჩინოსანმა აღნიშნა: „დასავლეთის ლიდერებს სურთ უკრაინის გამარჯვება, მაგრამ ისინი საკმარის მხარდაჭერას არ უწევენ ამ მიზნის მისაღწევად“.

როგორც მედია წერს, კიევის ახალ გამოწვევებს შორის არის დონალდ ტრამპის პოტენციური გამარჯვება აშშ-ის საპრეზიდენტო არჩევნებში, რომელმაც განაცხადა, რომ გამარჯვების შემთხვევაში, რუსეთთან სწრაფ სამშვიდობო შეთანხმებას შეეცდება. ამასთან, რუსეთი მომავალ წელს სამხედრო ხარჯების 25%-ით გაზრდას გეგმავს, რაც ომის გაგრძელების გრძელვადიან მზადყოფნაზე მიუთითებს.

ევროპასა და შეერთებულ შტატებში ვიზიტის დროს უკრაინის პრეზიდენტმა ვოლოდიმირ ზელენსკიმ იარაღის მიწოდების გაზრდა და უსაფრთხოების გარანტიების მოპოვება მოითხოვა. ზელენსკიმ წარმოადგინა თავისი „გამარჯვების გეგმა“, რომელიც ითვალისწინებს ომის დასრულებას უკრაინისთვის ხელსაყრელი პირობებით. თუმცა, ბაიდენის ადმინისტრაციამ ცივად უპასუხა.

პრეზიდენტ ზელენსკის მრჩეველმა, მიხაილო პოდოლიაკმა გეგმა აღწერა, რომელიც მოიცავს სამხედრო, ეკონომიკურ, პოლიტიკურ და დიპლომატიურ ნაბიჯებს, რომლებიც საჭიროა ომის დასასრულებლად. ძირითადი მოთხოვნები მოიცავს შორ მანძილზე მოქმედი ATACMS და Storm Shadow რაკეტების მიწოდებას, რაც უკრაინულ ძალებს საშუალებას მისცემს დაარტყას სამიზნეებს რუსეთში. პოდოლიაკმა აღნიშნა: „ამან შეიძლება შეცვალოს პუტინის გათვლა, გაზარდოს შიდა ზეწოლა რუსეთში“.

შეერთებულმა შტატები ჯერჯერობით უარს აცხადებს მსგავს ქმედებებზე, კონფლიქტის ესკალაციის შიშით, მაგრამ პოდოლიაკმა გააფრთხილა, რომ დამატებითი დახმარების გარეშე, ომი შეიძლება გაგრძელდეს წლების განმავლობაში, რაც შეასუსტებს დასავლეთის საერთაშორისო პოზიციებს.

მედიის ცნობით, აგვისტოში უკრაინელმა ჯარებმა განახორციელეს მოულოდნელი შეტევა რუსეთის კურსკის ოლქში, დაიპყრეს დაახლოებით 100 ქალაქი და სოფელი, ასევე, განახორციელეს შორ მანძილზე დარტყმების სერია რუსეთის ობიექტებსა და ოკუპირებულ ტერიტორიაზე. თუმცა, უკრაინული ძალები განიცდიან ტექნიკის, კერძოდ, ჯავშანტექნიკის და არტილერიის, ასევე, პერსონალის დეფიციტს.

საშინაო ფრონტზე უკრაინელები სულ უფრო დაღლილები არიან ომისგან და ზოგიერთი გამოკითხვა აჩვენებს მოლაპარაკების მსურველთა რიცხვის ზრდას. 

რუსეთიც მნიშვნელოვან დანაკარგს განიცდის. ამერიკელი ანალიტიკოსების აზრით, სექტემბერი რუსული არმიისთვის ყველაზე მომაკვდინებელი თვე გახდა, სადაც დღეში 1 200-მდე ჯარისკაცი დაკარგა. როგორც აშშ-ის არმიის ვიცე-პოლკოვნიკმა ჯონ ნაგლმა აღნიშნა: „უკრაინა აგრძელებს რუსეთისთვის დანაკარგის მიყენებას. პუტინის იმედი შედარებით იოლი გამარჯვების შესახებ ტრამპის გამარჯვებაზეა დამოკიდებული“.

უკრაინელი სამხედროები თანხმდებიან, რომ ნებისმიერი სამშვიდობო შეთანხმება სრული გამარჯვების გარეშე არ გაგრძელდება. როგორც უპილოტო საფრენი აპარატის ხელმძღვანელმა ალექსანდრე სოლონკომ აღნიშნა: „ისინი ისევ თავს დაესხმებიან და ასე გაგრძელდება ვიდრე, ჩვენი ქვეყანა არ გაქრება მსოფლიო რუკიდან“.

შეგახსენებთ, რუსი ოკუპანტები ამჟამად მაქსიმალურ ძალას იყენებენ დონეცკის რეგიონის ტერიტორიების დასაკავებლად.