უკრაინა სულ მცირე 10 ახალ ბრიგადას ქმნის, მაგრამ მათ იარაღი აკლიათ - ISW
მობილიზაციის ფონზე, უკრაინა აყალიბებს რამდენიმე ახალ ბრიგადას, მაგრამ, სავარაუდოდ, ვერ შეძლებს მათ შეიარაღებას პარტნიორების დახმარების გაჭიანურების გამო, - ამის შესახებ უკრაინული მედია ომის კვლევის ინსტიტუტზე დაყრდნობით წერს.
როგორც ომის შესწავლის ინსტიტუტი (ISW) იუწყება, დასავლეთის დროული დახმარება კვლავ რჩება კრიტიკულ ფაქტორად, რთულია იმის დადგენა, თუ როდის და რამდენად შეძლებენ უკრაინული ძალები კონტრშეტევით ოპერაციებს ბრძოლის ველზე.
უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინული ძალები მობილიზაციის შემდეგ უკეთეს მდგომარეობაში არიან, ვიდრე რამდენიმე თვის წინ. თუმცა, მან, ასევე, აღიარა, რომ უკრაინის შესაძლებლობა განახორციელოს მომავალი კონტრშეტევითი ოპერაცია დამოკიდებულია ბრიგადების აღჭურვაზე მძიმე ტექნიკით, როგორიცაა მექანიზებული საბრძოლო მანქანები, ჯავშანტრანსპორტიორი, ტანკები და მძიმე არტილერია. ანალიტიკოსები ამბობენ, რომ სულ მცირე 10 ახალი უკრაინული ბრიგადის შექმნაა დაგეგმილი.
ერთ-ერთი უკრაინული დანაყოფის მეთაურის თქმით, უკრაინულ ძალებს მის ოპერატიულ ზონაში საბრძოლო მასალა უფრო სჭირდებათ, ვიდრე ცოცხალი ძალა.
ზელენსკიმ აღიარა, რომ სამხედრო ტექნიკის ფრონტზე მისვლას ძალიან დიდი დრო სჭირდება.
ანალიტიკოსების ცნობით, არ არის დრო, რომ დაველოდოთ უსაფრთხოების დახმარებას დასავლეთიდან ახალი დანაყოფების აღჭურვისთვის. რუსები ცდილობენ გამოიყენონ ინიციატივა ბრძოლის ველზე, რათა აიძულონ უკრაინა, ჩადოს ცოცხალი ძალა და აღჭურვილობა მიმდინარე თავდაცვით ოპერაციებში და ხელი შეუშალოს მას საჭირო გადამწყვეტი პერსონალისა და რესურსების შეგროვებაში.
