დონეცკის ოლქის ქალაქი სივერსკი თითქმის მთლიანად დაკარგულია. მასზე კონტროლის აღსადგენად რეზერვისტებია საჭირო, - ამის შესახებ „უკრაინსკაია პრავდა“ სამხედრო სარდლობის, სივერსკისა და მიმდებარე ტერიტორიაზე მოქმედი ბრიგადების ორ თანამოსაუბრეზე დაყრდნობით იუწყება.

„სივერსკში სიტუაცია კრიტიკულია. დაკარგული პოზიციების აღსადგენად რეზერვისტების მობილიზებაა საჭირო. ჰყავს თუ არა ისინი ფრონტის ამ მონაკვეთზე დავალებების შემსრულებელ კორპუსს? არა. ჰყავს თუ არა ისინი „აღმოსავლეთის“ სარდლობის უფროს მეთაურს? გაურკვეველია, უზრუნველყოფს თუ არა მეთაური რეზერვს და შეძლებს თუ არა ეს რეზერვი ამ სიტუაციაში რამის გამოსწორებას“, - განუცხადა გამოცემას თანამოსაუბრემ.

ინფორმაციაში აღნიშნულია, რომ ბოლო რამდენიმე კვირის განმავლობაში უკრაინის არმია სივერსკის ნაწილს ძირითადად დრონებით აკონტროლებდა და არა ქვეითი ჯარით. მას შემდეგ, რაც რუსეთის ფედერაციამ ქალაქის ჩრდილოეთით მდებარე სიმაღლეები დაიკავა, სივერსკში მოქმედება პრაქტიკულად შეუძლებელი გახდა, ხოლო ლოჯისტიკა უკიდურესად რთული.

„ყველაზე ოპტიმისტური სცენარის მიხედვით, 13 დეკემბრის მდგომარეობით, სივერსკში საბრძოლო მოქმედებების ხაზი მდინარე ბახმუტკას გასწვრივ გადის. შესაბამისად, ქალაქის აღმოსავლეთის, უფრო დიდი ნაწილი მთლიანად რუსეთის კონტროლის ქვეშაა, დასავლეთის, უფრო პატარა ნაწილი კი ზოგიერთ ადგილას კვლავ უკრაინული პოზიციების ქვეშაა. უფრო პესიმისტური სცენარის მიხედვით, მთელი ქალაქი, ადმინისტრაციული საზღვრის გასწვრივ, მთლიანად რუსეთის კონტროლის ქვეშაა“, - ნათქვამია მედიის მიერ გავრცელებულ ინფორმაციაში. 

გამოცემის ცნობით, რუსები უკვე შენიშნეს სივერსკის სამხრეთით.