ოკუპანტი ძალებს აგროვებს პოკროვსკის მიმართულებით, ბრძოლაში მონაწილეობენ ყველაზე გამოცდილი თავდასხმის ნაწილები, - ამის შესახებ შეიარაღებული ძალების მთავარსარდალმა ალექსანდრე სირსკიმ განაცხადა.

სირსკის განცხადებით, კუპიანსკის მიმართულებით სასტიკი ბრძოლები გრძელდება.

მთავარსარდლის თქმით, ოკუპანტები აქტიურად ახორციელებენ შეტევებს სივერსკის რაიონში არტილერიის გამოყენებით, მაგრამ წარმატებას ვერ მიაღწევენ. ხარკოვის მიმართულებით, ვოვჩანსკის რაიონში, ასევე, მიმდინარეობს ბრძოლები, მაგრამ მოწინააღმდეგე წარმატებას ვერ მიაღწევს და მნიშვნელოვან დანაკარგს განიცდის.

„საბრძოლო მოქმედებები გრძელდება. ზოგან, დიდი დანაკარგების ფასად, ოკუპანტს მცირე წარმატება აქვს. აქტიური საომარი მოქმედებების დროს, ჯარების ტაქტიკური პოზიციები შეიძლება დღის განმავლობაში რამდენჯერმე შეიცვალოს. ამ დროისთვის მნიშვნელოვანი ცვლილებები არ მომხდარა“, - დასძინა სირსკიმ.

მთავარსარდალმა აღნიშნა, რომ ეროვნული პოლიციის, უკრაინის უშიშროების სამსახურის და სამხედრო სამართალდამცავი სამსახურის ძალები კონტრდივერსიულ მოქმედებებს ახორციელებენ. მათი ქვედანაყოფები ამჟამად ავლენენ და ანეიტრალებენ აგრესორის დივერსიულ ჯგუფებს ქალაქებში ტორეცკის მიმართულებით.