უკრაინაში ომი დასასრულს უახლოვდება, - ამის შესახებ უკრაინის რადას თავდაცვის და უსაფრთხოების კომიტეტის თავმჯდომარემ ფიოდორ ვენისლავსკიმ განაცხადა.

„ახლა, როდესაც აშკარაა, რომ ომი დასასრულს უახლოვდება, ზოგი ამას აღიარებს, ზოგი კი არა. სინამდვილეში კი, ჩვენ ამ მიმართულებით მივდივართ“, - აღნიშნა მან რადიო NV-ის ეთერში.

მან განმარტა, რომ ამაზე განსაკუთრებით აშშ-ის პრეზიდენტის, დონალდ ტრამპის ერთ-ერთი განცხადება მიუთითებს. მისი თქმით, ამერიკელ ლიდერს ნათლად ესმის, რომ უკრაინის პრეზიდენტ ვოლოდიმირ ზელენსკის და კრემლის ლიდერს პუტინს შორის მოლაპარაკებებში მისი პირადი მონაწილეობის გარეშე ეს პროცესი ვერ გაგრძელდება.

„და ის მზადაა გააძლიეროს თავისი ძალისხმევის სწორედ ეს ვექტორი. და ჩვენ დაახლოებით ერთი თვის წინ ვისაუბრეთ ამაზე, რომ შემდეგი შეხვედრა მხოლოდ სამმხრივ ფორმატში შეიძლება იყოს“, - დასძინა ვენისლავსკიმ.

როგორც მან აღნიშნა, ზელენსკის და პუტინს შორის ორმხრივი შეხვედრა, სავარაუდოდ, რაიმე შედეგს არ გამოიღებს.

„პუტინს სძულს ჩვენი პრეზიდენტი, ჩვენი პრეზიდენტი არ იღებს პუტინს, რომელმაც ამდენი მწუხარება მოუტანა ჩვენს ხალხს. ამიტომ, ვფიქრობ, რომ ამ შეხვედრას, რომლის შესახებაც დონალდ ტრამპმა 14 სექტემბერს გამოაცხადა, ყველა შანსი აქვს, რომ საომარი მოქმედებების დასრულება და მშვიდობა დააახლოოს“, - დასძინა ფიოდორ ვენისლავსკიმ.