აშშ-ის პრეზიდენტ დონალდ ტრამპსა და რუსეთის ლიდერ ვლადიმერ პუტინს შორის ალასკაში დაგეგმილი სამიტის წინ დიპლომატიური წრეები უკრაინის პრეზიდენტ ვოლოდიმირ ზელენსკის პოზიციის შერბილებაზე მსჯელობენ.

როგორც The Telegraph-ი ევროპულ წყაროებზე დაყრდნობით წერს, კიევი მზადაა, განიხილოს საომარი მოქმედებების დასრულების ვარიანტი ლუგანსკის, დონეცკის, ზაპოროჟიეს, ხერსონის ოლქებისა და ყირიმის უკვე ოკუპირებულ ტერიტორიებზე რუსეთის კონტროლის ფაქტობრივი აღიარებით.

ეს სცენარი, რომელსაც ზოგიერთი ევროპული დედაქალაქი მხარს უჭერს, ფრონტის ხაზის გაყინვას და უკრაინისთვის უსაფრთხოების გარანტიების მიწოდებას ითვალისწინებს, მათ შორის იარაღის მიწოდებას და ნატოში გაწევრიანების პერსპექტივას. ამავდროულად, ზელენსკი ხაზგასმით აღნიშნავს, რომ არცერთი შეთანხმება არ უნდა მოიცავდეს დამატებით ტერიტორიულ დათმობებს.

ევროპელმა ლიდერებმა, მათ შორის ემანუელ მაკრონმა, დონალდ ტუსკმა და ფრიდრიხ მერცმა, განაცხადეს, რომ საერთაშორისოდ აღიარებული საზღვრების ძალის გამოყენებით შეცვლა მიუღებელია და ისინი გეგმავენ ტრამპთან შეხვედრას ოთხშაბათს [13 აგვისტოს], რათა ამერიკელი ლიდერის პუტინთან შეხვედრის წინ საკუთარი არგუმენტები წარადგინონ. 

თავად ტრამპმა განაცხადა, რომ სამიტზე უკრაინის მიწების ნაწილობრივ დაბრუნებას შეეცდებოდა. თუმცა მან გააკრიტიკა კიევის პოზიცია ნებისმიერი ტერიტორიული ცვლილების კონსტიტუციური დამტკიცების აუცილებლობასთან დაკავშირებით.

თუმცა ნატო ხაზს უსვამს, რომ ტერიტორიების ფაქტობრივი ოკუპაცია იურიდიულად არ შეიძლება აღიარებული იყოს. უკრაინის ხელისუფლება კი ამბობს, რომ რუსეთი აგრძელებს ჯარების გადაყვანას და ახალი შეტევებისთვის მზადებას, ამიტომ ნაადრევია საუბარი კრემლის მიერ ომის დასრულების მზადყოფნაზე.

დღეს რუსეთი აკონტროლებს უკრაინის ტერიტორიის დაახლოებით 20%-ს 1991 წლის საზღვრებში. უკრაინის საერთაშორისო პარტნიორები, მათ შორის დიდი ბრიტანეთი და კანადა, ხაზს უსვამენ კიევისთვის რაიმე გადაწყვეტილების დაძალების თავიდან აცილებას და აღნიშნავენ, რომ მშვიდობას უნდა მიაღწიონ თავად უკრაინის მონაწილეობით და არა მის ზურგს უკან.