არ ვიცი „ვივამედის“ განცხადება მაინცდამაინც გულისხმობს თუ არა მიხეილ სააკაშვილის ციხეში დაბრუნებას, შეიძლება, აქ საუბარია სხვა სამოქალაქო კლინიკაში გადაყვანაზე, - ამის შესახებ სახალხო დამცველმა, ლევან იოსელიანმა განაცხადა, რითაც ის კლინიკა „ვივამედის“ მიერ მიხეილ სააკაშვილის შესახებ გავრცელებულ განცხადებას გამოეხმაურა.

ომბუდსმენის განმარტებით, მას არ სურს მიხეილ სააკაშვილის მიმართ „ისეთი ქმედება განხორციელდეს, რომელმაც შეიძლება მისი ჯანმრთელობის მდგომარეობა უფრო დაამძიმოს ან გააუარესოს.“

„რაც შეეხება კლინიკა „ვივამედის“ განცხადებას, არ ვიცი განცხადება მაინცდამაინც გულისხმობს თუ არა მის ციხეში დაბრუნებას, შეიძლება, საუბარია სხვა სამოქალაქო კლინიკაში გადაყვანაზე. როგორც ვიცი, სახალხო დამცველმა პოზიცია დააფიქსირა, რომ ციხის საავადმყოფოში დაბრუნება, შეიძლება საშიში იყოს მისი ჯანმრთელობის მდგომარეობისთვის. ჩემი ინფორმაციით, კონსილიუმის წევრებიც ამ აზრზე არიან. მე ვიზიარებ იმ პოზიციას, რა პოზიციაც სახალხო დამცველს მიხეილ სააკაშვილის მიმართ ჰქონდა დაფიქსირებული. არ მინდა, რომ რაიმე ტიპის ისეთი ქმედება განხორციელდეს მის მიმართ, რომელმაც შეიძლება, მისი ჯანმრთელობის მდგომარეობა უფრო დაამძიმოს ან გააუარესოს. სხვა სამოქალაქო კლინიკაში გადაყვანა - თუ სად მოხდება, ეს არ არის ჩვენი პრეროგატივა, ეს შეიძლება, მათ შორის განხილული იყოს.

პენიტენციურ სისტემაში დაბრუნება თუ მისი ჯანმრთელობის მდგომარეობის გამაუარესებელი იქნება და ამ აზრზე არიან ჩემი ინფორმაციით, კონსილიუმის წევრები, რამდენიმე მათგანი, რა თქმა უნდა, ეს არ უნდა მოხდეს. ის სამოქალაქო საავადმყოფოში უნდა დარჩეს. უახლოეს მომავალში აღარ ვგეგმავ მის მონახულებას, რადგან ვერ ვხედავ ამის აუცილებლობას, რომ ისევ მე შევიდე. უფრო მნიშვნელოვანია, ის ადამიანები შევიდნენ, ვინც მის ჯანმრთელობაზე მონიტორინგს ახდენენ.

პოლონელ ექიმებთან დაკავშირებით მე ინფორმაცია არ მაქვს, რა ხდება ან რა კომუნიკაცია არსებობს მთავრობასა და ამ ჯგუფს შორის. მომხრე ვარ, რომ სხვა ქვეყნიდან პოლონეთიდან იქნება თუ სხვა ქვეყნიდან ექიმები, რომლებიც დაინტერესებულები არიან მისი მდგომარეობით მიეცეთ საშუალება, რომ მივიდნენ და მოინახულონ“, - განაცხადა იოსელიანმა.