მე ამ საკანონმდებლო ცვლილებებს ხმა შეიძლება მივცე, მაგრამ ეს არ არის საკმარისი იმისთვის, რომ ქვეყანაში სამართლიანი არჩევნები ჩატარდეს, - ამის შესახებ „ნაციონალური მოძრაობის“ წევრმა ანა წითლიძემ პარლამენტში გამართულ ბრიფინგზე განაცხადა, რომელიც საარჩევნო კოდექსში ცვლილებებს და მასზე ვენეციის კომისიის და ეუთო/ოდირის დასკვნის პროექტს ეხებოდა.

მისივე თქმით, მნიშვნელოვანი საკითხები, რაც ცვლილებებში შესული არ არის და დასკვნის პროექტში ყურადღება მახვილდება, არის დამატებითი ასპექტები საარჩევნო კომისიების დაკომპლექტებასთან დაკავშირებით, საარჩევნო კამპანიისას დებულებები ოფიციალური თანამდებობის ბოროტად გამოყენებაზე, მაღალი ზღვარი საარჩევნო შემოწირულობებისთვის, ამომრჩეველთა დაშინების პრევენციისთვის მიმართული ზომები და ა.შ.

„ჩემი მიზანი არ არის ამ პოზიტიური ცვლილებების დაკნინება, მაგრამ ხელისუფლება ცდილობს წარმოაჩინოს, რომ ეს საკანონმდებლო ცვლილებები ამ ქვეყანაში უზრუნველყოფს დემოკრატიულ და სამართლიან არჩევნებს, რაც ასე არ არის. განხორციელებული ცვლილებები, რაც ეუთო/ოდირმა დადებითად შეაფასა, საარჩევნო პროცესის მხოლოდ 10 პროცენტია, 90 პროცენტი კი, რაც არის საარჩევნო გარემო, ძალადობა, ამომრჩევლის მოყიდვა, რჩება პრობლემად. ეუთო/ოდირის პოზიტიური დასკვნა მთელ რიგ საკითხებში ემთხვევა „ნაციონალური მოძრაობის“ პოზიტიურ დასკვნებს, მაგრამ ასევე ემთხვევა მთელი რიგი შენიშვნები და რეკომენდაციები. ეუთო/ოდირი ამბობს, რომ წარმოდგენილი ცვლილებები არ არის სრული და ყოვლისმომცველი და ეხება მხოლოდ კონკრეტულ საკითხებს. წარმოდგენილი ცვლილებები ნაწილობრივ ისახავს მიზნად საარჩევნო რეფორმის შესახებ ევროკავშირის რეკომენდაციების შესრულებას, მაგრამ არ ეფუძნება საარჩევნო კოდექსის სრულ გადახედვას. ვენეციის კომისია და ეუთო/ოდირი იძლევიან რეკომენდაციას, რომ ჩატარდეს ყოვლისმომცველი რეფორმა და საარჩევნო კანონმდებლობა შეიცვალოს არჩევნებამდე საკმაო ხნით ადრე. ამავე დასკვნაში გვეუბნებიან, რომ მიუხედავად ამ ცვლილებების პოზიტიური შეფასებისა, არის მთელი რიგი საკითხები საარჩევნო გარემოსთან დაკავშირებით, რომლის მოუწესრიგებლობის შემთხვევაში, არჩევნები ვერ ჩაითვლება დემოკრატიულად და სამართლიანად. იძლევიან რეკომენდაციას, რომ მათი ბოლო მოსაზრებები განხორციელდეს,“ - განაცხადა წითლიძემ.

წითლიძე ასევე გამოეხმაურა „მოქალაქეების“ დეპუტატის, ლევან იოსელიანის განცხადებას, რომ საარჩევნო კოდექსის საკითხზე, „ნაციონალური მოძრაობის“, „სტრატეგია აღმაშენებლისა“ და „ლელოს“ წარმომადგენლები „ქართულ ოცნებას“ შეხვდნენ, რის შესახებაც მმართველი გუნდის წევრის, გივი მიქანაძისგან გაიგეს. წითლიძის თქმით, შეხვედრა კომიტეტის ფარგლებში ჰქონდათ და მათი რამდენიმე რეკომენდაცია გაითვალისწინეს.

„მე ამ საკანონმდებლო ცვლილებებს ხმა შეიძლება მივცე, რადგან განხორციელებული ცვლილებების10 პროცენტი არის კარგი, მაგრამ ეს არ არის საკმარისი იმისთვის, რომ ქვეყანაში სამართლიანი არჩევნები ჩატარდეს. მაგალითად, გაითვალისწინეს, რომ ელექტრონული დათვლის დროს ხარვეზისას უპირატესობა მიენიჭოს ხელით დათვლას, მაგრამ ეს უშველის იმ ფაქტს, ადამიანებს წინასაარჩევნოდ სოციალურ დახმარებებს რომ უხსნიან „ქართული ოცნების“ მხარდამჭერები თუ არ არიან? ან იმას, არჩევნების პროცესში კანონიერი ქურდები და უბნის მაყურებლები რომ მონაწილეობენ პირადობის მოწმობის ჩამორთმევაში?“ - აცხადებს წითლიძე.