2014 წლის შემდეგ, პირველად საქართველოში პატენტრწმუნებულთა საკვალიფიკაციო გამოცდა ტარდება.

პატენტრწმუნებულის სტატუსის მოპოვების მიზნით, გამოცდაში მონაწილეობისათვის საქპატენტში სარეგისტრაციო განაცხადი წარადგინა 50-მდე პირმა.

გამოცდის I ეტაპი – ტესტური გამოცდა დღეს გაიმართა, ხოლო II ეტაპი, რომელიც წერით დავალებას მოიცავს, 2 კვირის შემდეგ ჩატარდება.

საგამოცდო დავალებები შემუშავდა უცხოელი ექსპერტების მიერ.

პროცესში აქტიურად იყვნენ ჩართულნი ინტელექტუალური საკუთრების მსოფლიო ორგანიზაციის (WIPO) და ევროპის საპატენტო უწყების (EPO) რეკომენდაციით შერჩეული მაღალკვალიფიციური ექსპერტები საფრანგეთიდან, აშშ-დან და ტაილანდიდან.

ვინაიდან, საერთაშორისო გამოცდილებასთან ერთად, მნიშვნელოვანი იყო ადგილობრივი სპეციფიკის გათვალისწინებაც, დავალებების შემუშავების პროცესში მონაწილეობა მიიღეს ქართველმა სპეციალისტებმაც, რამაც განაპირობა გამოცდის საერთაშორისო პრაქტიკასთან ჰარმონიზება და ეროვნულ კანონმდებლობაზე მორგება.

საქართველოს პატენტრწმუნებულთა საკვალიფიკაციო გამოცდას წინ უძღოდა ბოლო წლებში ინტელექტუალური საკუთრების ეროვნული სისტემის ფართომასშტაბიანი რეფორმა, რომელიც მიზნად ისახავდა, აგრეთვე, პატენტრწმუნებულთა ინსტიტუტის თანამედროვე მოთხოვნებთან შესაბამისობაში მოყვანასა და პატენტრწმუნებულთა პროფესიის განვითარების ხელშეწყობას.

ამ მიმართულებით განსაკუთრებული მნიშვნელობა შეიძინა „საქართველოს პატენტრწმუნებულთა შესახებ“ ახალმა კანონმა, რომელიც საქპატენტის მიერ მომზადდა და 2024 წლის 15 მაისს საქართველოს პარლამენტის მიერ იქნა მიღებული. აღნიშნული კანონი ეფუძნება საუკეთესო საერთაშორისო პრაქტიკას და ახლებურად აწესრიგებს როგორც პროფესიის სამართლებრივ ჩარჩოს, ისე ინსტიტუციურ გარემოს.

ახალი კანონის საფუძველზე, განხორციელდა საკვანძო ცვლილებები: პატენტრწმუნებულთა სპეციალიზაცია განისაზღვრა ორ მიმართულებად – საერთო და სასაქონლო ნიშნების, სავალდებულო გახდა განგრძობადი პროფესიული განათლება და პროფესიული პასუხისმგებლობის დაზღვევა.

გარდა ამისა, შემოღებულ იქნა საკვალიფიკაციო გამოცდის ახალი სტანდარტი, რომელიც ხელს უწყობს მაღალკვალიფიციური პატენტრწმუნებულების შერჩევას, მათი პროფესიული ცოდნის გაღრმავებას, სათანადო უნარ-ჩვევების გამომუშავებას, ახალი პროფესიონალების მოზიდვასა და, ზოგადად, პროფესიული კორპუსის ჩამოყალიბებას.

პატენტრწმუნებულთა საკვალიფიკაციო გამოცდა საქართველოს იუსტიციის სასწავლო ცენტრში ჩატარდა.

გამოცდის მეორე ეტაპი – წერითი გამოცდა კი 13 დეკემბერს გაიმართება.