„ჩვენ ვართ სტრატეგიული მოთმინების პოლიტიკის მდგომარეობაში“, – ამის შესახებ პარლამენტის თავმჯდომარემ, შალვა პაპუაშვილმა საქართველოს პირველი არხის გადაცემის „აქტუალური თემა – მაკა ცინცაძესთან ერთად“ სტუმრობისას განაცხადა.

შალვა პაპუაშვილმა უპასუხა გადაცემის წამყვანის შეკითხვას, რა ეტაპზე ვართ აშშ-თან ურთიერთობის გადატვირთვის საკითხში იმის გათვალისწინებით, როცა ხელისუფლების ოპონენტები ამ დრომდე საუბრობენ, რომ შეწყვეტილია სტრატეგიული პარტნიორობა და აშშ-ის მხრიდან შემხვედრი ნაბიჯები არ ჩანს.

„ჩვენ ჩვენი სათქმელი თქვით, ჩვენ ჩვენი ხელი გავუწოდეთ და ჩვენ ველოდებით პასუხს. რაც უფრო მალე იქნება პასუხი, მით უფრო კარგი იქნება ქართულ-ამერიკული ურთიერთობებისთვის, რაც უფრო გვიან იქნება პასუხი, ჩვენს გზას ვაგრძელებთ, ეკონომიკური ზრდის ტემპებიც კარგია, აგერ ექვს მილიარდ ნახევრიანი ინვესტიცია შემოდის, ისტორიაში ყველაზე მაღალი. ჩვენ ჩვენს საქმეს ვაგრძელებთ და ვისაც უნდა ჩვენთან მეგობრობა, ყველამ კარგად იცის, როგორი მეგობრობა ვიცით. ვინ-ვინ და აშშ-მა ყველაზე კარგად იცის. ევროპელები როდესაც გაექცნენ ავღანეთის საბრძოლო ველიდან, ზოგი შტაბში რომ იმალებოდა და ზოგმა საკუთარი ქვეყნიდან ფეხი რომ არ გამოყო, ქართველები გავყევით ამერიკელებს ომში ავღანეთში და სანგრებში იდგნენ ქართველი ჯარისკაცები. სხვათა შორის, ამას ყველა ამერიკელი ახსენებს, რომ თუკი ვინმესთან უნდოდა ამერიკელ ჯარისკაცს ერთად ყოფნა წინა ხაზზე, იყო ქართველი ჯარისკაცი. ეს ყველაზე კარგად იციან ამერიკელებმა, ჩვეულებრივმა ამერიკელებმა, ვისაც შეხება ჰქონია ქართველებთან და მათ შორის, ჯარისკაცებიდან; მათ შორის, ძალიან კარგად იციან პოლიტიკოსებმაც. ასე რომ, თუკი უნდათ მეგობრობა, იციან ჩვენი მისამართი, იციან სად არის საქართველო, იციან ჩვენი წარსული, იციან ჩვენი აწმყო და იციან ჩვენი მომავალი“, – განაცხადა პაპუაშვილმა.

შეკითხვაზე, როგორ შეაფასებს ნატოს გენმდივნის, რუტეს განცხადებას, რომ შეშფოთებულები არიან იმით, რაც ხდება საქართველოში და იმ რეალობაში, როცა საქართველო ყველაზე დიდი კონტრიბუციით იყო წარმოდგენილი საერთაშორისო მისიებში, რატომ არ უფასებენ საქართველოს იმ წვლილს, რაც შეტანილი აქვს მთელ ამ პროცესში, შალვა პაპუაშვილმა განაცხადა, რომ არა მხოლოდ არ უფასებენ, ზოგიერთისგან ხანდახან საყვედურის ტონიც კი ისმის.

„ზოგიერთისგან ხანდახან საყვედურის ტონიც კი შეიძლება, მოვისმინოთ ხოლმე, რა ხდება, არ გინდათ ნატოს წევრობა, აბა, როგორ არის, რას აკეთებთ, კიდევ გინდათ, თუ არ გინდათ. საქართველოს ნატო-ს წევრობას ხელს უშლის მხოლოდ ნატო, მეტი არავინ. ასე რომ, თვითონ არ იღებენ, ვერ იღებენ, არ ჰყოფნით გამბედაობა, არ აქვთ სურვილი, არ ვიცი, რა არის მოტივი, მაგრამ მათი გადასაწყვეტი საკითხია, ბურთი მთლიანად ნატო-ს მოედანზეა; საქართველოს გაკეთებული აქვს ყველაფერი, დამტკიცებული აქვს ყველაფერი, ჩვენ აღარაფერი აღარ გვაქვს დასამტკიცებელი ნატოსთვის და ასე ვთქვათ, არანაირი გამოცდა აღარ გვაქვს ჩასაბარებელი. ჩვენ ეს გამოცდა ჩავაბარეთ სისხლით. ასე რომ, თუ აქვთ სურვილი, მიიღონ გადაწყვეტილება და თუ ამ გადაწყვეტილებას არ იღებენ, ესეც უნდა თქვან. იმიტომ, რომ ამ უთქმელობამ რაც მოიტანა, ვხედავთ ახლა უკრაინაში. მათ შორის, უკრაინასთან ეს კატა თაგვობანას თამაშია. ტრამპი ამ მხრივ, ღიად, ცხადად ამბობს, რომ უკრაინა არ გახდება ნატო-ს წევრი და წერტილი. გამოდის შემდეგ ნუ, ესტონეთის მთავრობის დონეზე ვიღაც, ასეთ დონეზე დგანან და ამბობენ, რას ჰქვია, ვინ ეკითხება და ასე შემდეგ. ხომ არ შეიძლება არა ასე? ხალხი იბრძვის, მართლა იბრძვის, ამ უფლებისთვის იბრძვის მათ შორის. ხომ ეს იყო მათ შორის, ერთ-ერთი მთავარი მოტივატორი, რომ სუვერენიტეტი და ჩვენი უფლებაა, ავირჩიოთ ალიანსები და ამისთვის ვიბრძვითო? ამისთვის იბრძვიან სამ წელიწად-ნახევარია, ასობით ათასი ადამიანი დაიღუპა ამ იდეისთვის, რომ აირჩიონ ალიანსები და მათ შორის, იყვნენ ნატო-ს წევრი. ამისთვის იბრძვიან და არ აღირსეს პასუხი, არ აღირსეს პატიოსანი პასუხი. პატიოსან პასუხს არ სცემენ და ეთამაშებიან ასე რა, ხან ღია კარში ხარ, ხან ასე ხარ, ხან ერთ ქვეყანას უნდა, ხარ მეორეს არ უნდა. როგორ შეიძლება, ასე მოექცე ქვეყანას და სახელმწიფოს?“, – განაცხადა პაპუაშვილმა.

მისი თქმით, მათ შორის, საქართველოს მიმართაც ზუსტად ეს დამოკიდებულებაა.

„ამასწინათ, ერთ-ერთ უცხოურ ვიზიტზე თქვი კიდეც, შევარდნაძის სიტყვები გავიხსენე, რომელიც მან ნატო-ზე თქვა ზუსტად, რომ ღია არის კარი და მაინცდამაინც დიდხანს ნუ დაგვაყენებთ ამ ღია კარში, ვინაიდან ორპირ ქარში გავცივდებითო. ვხედავთ ჩვენ ორპირ ქარში ყოფნა უკრაინას რა დაუჯდა და რა დაგვიჯდა ჩვენ, მათ შორის, 2008 წელს ორპირ ქარში ყოფნა. ამიტომ, მოიქცნენ, როგორც სერიოზული ალიანსი და თქვან ბოლოს და ბოლოს, ან მიიღონ გადაწყვეტილება და გაბედონ, თუკი ეს გადაწყვეტილება უნდა მიიღონ და თითს ნუ იშვერენ უკრაინისკენ და საქართველოსკენ, თითქოს, ახლა რაღაცები აქვს კიდევ ვინმეს დასამტკიცებელი. ჩვენ და ჩვენზე მეტად კიდევ უკრაინა სამ წელიწად-ნახევარი ამისთვის იბრძვის, საკუთარი უფლებისთვის, იყოს ნატო-ს წევრი, აირჩიოს თვითონ ალიანსი. ამისთვის იბრძვის, დაიხოცა ხალხი ამ იდეისთვის და დღეს ასე კატა თაგვობანა აქვთ, რომ არ ვიცით, გახდება თუ არ გახდება, მათ შორის, ნატო-სგანაც ხან იყო, იცით რა, ეს პირობა არასდროს არ ყოფილა, ეს დამოკიდებულია კონსენსუსზე და ა.შ. ნუ, აი, როგორ შეიძლება უბრალოდ, რომ ასეთი დამოკიდებულება იყოს ქვეყნის მიმართ? ასე რომ, აქაც მე მგონი, მნიშვნელოვანი არის, იყოს კეთილსინდისიერი და პატიოსანი დამოკიდებულება და კიდევ ერთხელ, თუკი საქართველოს წევრობა უნდათ, იციან, სად ვართ, იციან, რა შეგვიძლია, იციან, როგორ ვიცით ბრძოლა და გვერდით დგომა; თუკი უნდათ, მიიღონ გადაწყვეტილება და თითის გამოშვერას ქართველი ხალხის მიმართ ყველამ დაანებოს თავი. მორჩა, ეს ის ქართველი ხალხი არ არის, რომელიც უტარებდა სხვადასხვა უცხოურ ინტერესების ჯგუფებს. ხან მოდიოდნენ და ასე აირჩიე მოსამართლეო, ჭკუას გვასწავლიდნენ, ხან მოდიოდნენ და კანონში ეს ჩაწერე, ეს გააკეთე, ეს არ გააკეთოო. ყველას თავის გემოზე უნდოდა, ეს ქვეყანა ყოფილიყო. ქართველი ხალხი ასეთი აღარ არის, მიამიტი ქართველი ხალხი აღარ არის. ასე რომ, თითის გამოშვერას დაანებონ თავი“, – განაცხადა პაპუაშვილმა.