რუსეთმა ცეცხლის შეწყვეტის შეთანხმება დაარღვია და უკრაინა შემდგომ ნაბიჯებს სამხედრო და სადაზვერვო სამსახურების საღამოს ანგარიშების საფუძველზე განსაზღვრავს. ამის შესახებ უკრაინის პრეზიდენტმა ვოლოდიმირ ზელენსკიმ Telegram არხზე განაცხადა.

ზელენსკიმ ხაზგასმით აღნიშნა, რომ უკრაინის ქალაქებსა და თემებზე - დნეპრზე, ზაპოროჟიეზე, კრამატორსკზე და სხვაგან - გუშინდელი სასტიკი იერიშების შემდეგ რუსეთის არმიამ დღეს აქტიური საბრძოლო მოქმედებები და ტერორისტული თავდასხმები განაგრძო.

„შეტევითი ოპერაციები ფრონტის ყველა ძირითად მონაკვეთზე გრძელდება და მხოლოდ ამ დღის დასაწყისიდან რუსეთის არმიამ უკვე განახორციელა თითქმის 30 შეტევითი ოპერაცია. მხოლოდ გასულ ღამეს და დილით დაფიქსირდა 20-ზე მეტი საჰაერო დარტყმა, რომელშიც გამოყენებული იყო 70-ზე მეტი ავიაბომბი“, - ხაზგასმით აღნიშნა მან.

სახელმწიფოს მეთაურის თქმით, გასული ღამის განმავლობაში რუსეთის არმიამ ასევე განახორციელა სხვადასხვა ტიპის დრონებით თავდასხმები. კერძოდ, უკრაინის თავდაცვის ძალებმა თითქმის 90 მოიერიშე დრონი გაანეიტრალეს. ასევე, იყო სარაკეტო დარტყმები. როგორც ზელენსკიმ აღნიშნა, ჯამში, დილის 10:00 საათის მონაცემებით, რუსეთის არმიამ ცეცხლის შეწყვეტის რეჟიმი 1820-ჯერ დაარღვია.

„უკრაინამ მკაფიოდ განაცხადა, რომ სარკისებურად იმოქმედებს, იმის გათვალისწინებით, რომ რუსეთი მედიისა და სოციალური ქსელების მეშვეობით მოსკოვის აღლუმის დროს დუმილის შენარჩუნებას ითხოვს. ყველა ნორმალური ადამიანისთვის აშკარაა, რომ სრულმასშტაბიანი ომი და ადამიანების ყოველდღიური მკვლელობები ცუდი დროა საჯარო „ზეიმებისთვის“, - აღნიშნა ზელენსკიმ. 

მან დასძინა, რომ ინტერნეტის გათიშვისა და კომუნიკაციების დაბლოკვის მიუხედავად, „რუსების უმეტესობას შესანიშნავად ესმის, რომ მათ ლიდერებს შეუძლიათ, ბუნკერიდან გამოვიდნენ და მშვიდობა აირჩიონ“.

„დღევანდელი მდგომარეობით, ჩვენ ვადასტურებთ, რომ რუსულმა მხარემ ცეცხლის შეწყვეტის შეთანხმება დაარღვია. ჩვენი სამხედრო და დაზვერვის საღამოს ანგარიშების საფუძველზე, განვსაზღვრავთ ჩვენს შემდგომ ნაბიჯებს“, - დაასკვნა ზელენსკიმ.