უკრაინის პრეზიდენტი ვოლოდიმირ ზელენსკი მიიჩნევს, რომ სრულიად შესაძლებელია უახლოეს დღეებში ამერიკულ მხარესთან ერთად ომის ღირსეული დასრულების მისაღწევად კონკრეტული ნაბიჯები გადაიდგას. 

„დღეს საღამოს  ამერიკული დროით  უკრაინული დელეგაცია უკვე უნდა იყოს ამერიკის შეერთებულ შტატებში და ჟენევიდან პუნქტების საფუძველზე გაგრძელდება დიალოგი. დიპლომატია აქტიურად რჩება. ამერიკული მხარე კონსტრუქტიულობას იჩენს და სრულიად რეალურია უახლოეს დღეებში ნაბიჯების ბოლომდე შემუშავება, რათა განვსაზღვროთ, ღირსეულად როგორ დავასრულოთ ომი. უკრაინის დელეგაციას აქვს საჭირო დირექტივები და მაქვს მოლოდინი, რომ ისინი უკრაინის მკაფიო პრიორიტეტების შესაბამისად იმუშავებენ“, - აცხადებს ზელენსკი. 

ინფორმაციისთვის, ზელენსკიმ სამშვიდობო დარეგულირების საკითხზე უკრაინის დელეგაციის ხელმძღვანელად ეროვნული უსაფრთხოების საბჭოს მდივანი რუსტემ უმეროვი დანიშნა.

უკრაინის პრეზიდენტის საიტზე გამოქვეყნებულ ბრძანებულებაში წერია, რომ უმეროვი აშშ-სთან, სხვა საერთაშორისო პარტნიორებთან და რუსეთის წარმომადგენლებთან მოლაპარაკების დროს უკრაინის დელეგაციას უხელმძღვანელებს. იგეგმება „სამართლიანი და მდგრადი“ მშვიდობის პირობების განხილვა.