ვოლოდიმირ ზელენსკი აშშ-ის პრეზიდენტის წარმომადგენლებს - სტივ უიტკოფს და ჯარედ კუშნერს ესაუბრა
უკრაინის პრეზიდენტმა ვოლოდიმირ ზელენსკიმ განაცხადა, რომ მას „პოზიტიური“ საუბარი ჰქონდა აშშ-ის ელჩებთან სტივ უიტკოფთან და ჯარედ კუშნერთან და შეაქო მათი მზადყოფნა, მომდევნო კვირების განმავლობაში უკრაინის ომის მოგვარებაზე იმუშაონ.
„ძალიან პოზიტიური საუბარი იყო. მადლიერი ვარ მზადყოფნისთვის, ვიმუშაოთ რაც შეიძლება აქტიურად მომდევნო კვირების განმავლობაში, რათა ხელი შევუწყოთ დიპლომატიას უკრაინის წინააღმდეგ რუსეთის ომის დასრულებისთვის“, - აღნიშნა ზელენსკიმ.
Reuters-ის ინფორმაციით, ზელენსკი კიევში ბრუნდებოდა მას შემდეგ, რაც ლონდონში დიდი ბრიტანეთის, საფრანგეთისა და გერმანიის ლიდერებთან ომის მოგვარების შესახებ მოლაპარაკებები გამართა. ევროპელმა ლიდერებმა მხარი დაუჭირეს ზელენსკისა და კრემლის ლიდერ ვლადიმერ პუტინს შორის შეხვედრის იდეას, რათა მხარეებმა ცეცხლის შეწყვეტის შეთანხმებას მიაღწიონ და განაცხადეს, რომ ევროპა თავის როლს შეასრულებს.
აშშ-ის შუამავლობით მიმდინარე მოლაპარაკებები, რომლებსაც უიტკოფი და კუშნერი ხელმძღვანელობენ, ჩიხში შევიდა, რადგან ვაშინგტონი ირანთან კონფლიქტზეა ფოკუსირებული. ზელენსკიმ მოგვიანებით განაცხადა, რომ მან საფრანგეთის პრეზიდენტ ემანუელ მაკრონთან აშშ-ის ელჩებთან საუბარი განიხილა და შემდგომი ნაბიჯები შეათანხმა.
მან დასძინა, რომ საუბარი ასევე შეეხო 7 ივნისს ლონდონში გამართულ მოლაპარაკებებს მაკრონთან, დიდი ბრიტანეთის პრემიერ-მინისტრ კირ სტარმერთან და გერმანიის კანცლერ ფრიდრიხ მერცთან.
უკრაინის პრეზიდენტმა ასევე აღნიშნა, რომ მას ესმის, რომ მსოფლიოს ყურადღების დიდი ნაწილი ირანზეა კონცენტრირებული, „თუმცა საერთო მიზანი ევროპაში მშვიდობის შესახებ დღის წესრიგში რჩება“. მან განმარტა, რომ აშშ-ის ელჩებთან განიხილა მოლაპარაკებების პერსპექტივები საფრანგეთის საკურორტო ქალაქ ევიანში დაგეგმილ G7-ის სამიტზე და მადლიერება გამოხატა შეერთებული შტატების მიმართ, მათ შორის „უკრაინის პოზიციის დადებითი შეფასებისთვის“.
ამასთან, Reuters-ს ინფორმირებულმა წყარომ დაუდასტურა, რომ აშშ-ისა და უკრაინის ოფიციალური პირები აგრძელებენ უიტკოფისა და კუშნერის კიევში შესაძლო ვიზიტის განხილვას, რომელიც შესაძლოა, უახლოეს კვირებში შედგეს. ეს იქნება ორი ელჩის პირველი ოფიციალური ვიზიტი უკრაინაში, რომლებიც ადრე რუსეთთან მოლაპარაკებებისთვის მოსკოვში იმყოფებოდნენ.
