აშშ-ის პრეზიდენტმა დონალდ ტრამპმა უზენაესი სასამართლოს გადაწყვეტილებას მისი ტარიფების გაუქმების შესახებ „ღრმა იმედგაცრუება“ უწოდა და განაცხადა, რომ მას რცხვენია უზენაესი სასამართლოს იმ მოსამართლეების, რომელთაგან ზოგიერთი თავად დანიშნა და რომლებმაც მისი ტარიფების წინააღმდეგ გადაწყვეტილება მიიღეს.

„უზენაესი სასამართლოს გადაწყვეტილება ტარიფებთან დაკავშირებით ღრმად იმედგამაცრუებელია და მე მრცხვენია სასამართლოს გარკვეული წევრების, აბსოლუტურად მრცხვენია იმის გამო, რომ არ ჰყოფნით გამბედაობა, გააკეთონ ის, რაც ჩვენი ქვეყნისთვის სწორია“, - განაცხადა ტრამპმა ბრიფინგზე.

პირველი ვადის განმავლობაში ტრამპმა კონსერვატორი მოსამართლეები ემი კონი ბარეტი და ნილ გორსაჩი დანიშნა, რომლებიც ტარიფების წინააღმდეგ გადაწყვეტილების მიღებისას შეუერთდნენ უზენაეს მოსამართლე ჯონ რობერტსს და უმრავლესობაში მყოფ სამ ლიბერალ მოსამართლეს.

„ისინი ეწინააღმდეგებიან ყველაფერს, რაც ამერიკას კვლავ ძლიერს, ჯანსაღს და დიდებულს ხდის. ისინი, ასევე, გულწრფელად რომ ვთქვათ, ჩვენი ერის სირცხვილს წარმოადგენენ“, - აღნიშნა ტრამპმა.