აშშ-ის პრეზიდენტმა დონალდ ტრამპმა განაცხადა, რომ იგი ვალდებულია, უჩივლოს BBC-ს Panorama-ს დოკუმენტურ ფილმში მისი გამოსვლის ნაწილის რედაქტირების გამო. ამის შესახებ ტრამპმა Fox News-თან ინტერვიუში განაცხადა, წერს BBC.

ტრამპს ჰკითხეს, აპირებს თუ არა სარჩელის შეტანას, რაზეც მან უპასუხა: „ალბათ, უნდა შევიტანო, იცით, რატომაც არა, რადგან მათ საზოგადოება მოატყუეს და ეს აღიარეს კიდეც“.

„მათ სინამდვილეში შეცვალეს ჩემი 6 იანვრის გამოსვლა, რომელიც ლამაზი, ძალიან დამამშვიდებელი გამოსვლა იყო და რადიკალურად ჟღერადი გახადეს. და სინამდვილეში შეცვალეს კიდეც. ის, რაც მათ გააკეთეს, საკმაოდ წარმოუდგენელი იყო“, - აღნიშნა აშშ-ის პრეზიდენტმა.

როდესაც კვლავ ჰკითხეს, გააგრძელებს თუ არა სამართლებრივ ქმედებებს, მან უპასუხა: „ვფიქრობ, ვალდებული ვარ, ეს გავაკეთო, რადგან ხალხს ვერ აიძულებ, ვერ მისცემ ამის გაკეთების უფლებას“.

Fox News-ის ინტერვიუ ორშაბათს, 10 ნოემბერს, ჩაიწერა, თუმცა BBC-სთან დაკავშირებული ნაწილი Fox News-მა აშშ-ში მხოლოდ სამშაბათს საღამოს გამოაქვეყნა.

BBC-მ ტრამპის ადვოკატებისგან წერილი 9 ნოემბერს მიიღო. მასში ისინი მოითხოვენ დოკუმენტური ფილმის „სრულ და სამართლიან გაუქმებას“, ბოდიშის მოხდას და „პრეზიდენტ ტრამპისთვის მიყენებული ზიანისთვის შესაბამისი კომპენსაციის გადახდას“.

კორპორაციას პასუხის გასაცემად დრო პარასკევამდე, 14 ნოემბრამდე, აქვს. BBC-მ განაცხადა, რომ მოთხოვნას დროულად გამოეხმაურება.

აღნიშნულ ფაქტთან დაკავშირებით BBC-ის გენერალურმა დირექტორმა ტიმ დეივიმ და BBC News-ის ხელმძღვანელმა დებორა ტერნესმა თანამდებობიდან გადადგომის შესახებ განაცხადეს.