მას შემდეგ, რაც აშშ-ის უზენაესმა სასამართლომ პრეზიდენტ დონალდ ტრამპის გლობალური ტარიფები უკანონოდ ცნო, ტრამპმა განაცხადა, რომ არსებობს ტარიფების დაწესების ალტერნატიული მეთოდები, რომელთა მეშვეობითაც შესაძლებელია მეტი შემოსავლის გამომუშავება. 

„სხვა ალტერნატივები ახლა გამოყენებული იქნება იმ ვარიანტების ჩასანაცვლებლად, რომლებიც სასამართლომ არასწორად უარყო. ჩვენ გვაქვს ალტერნატივები“, - განუცხადა მან თეთრ სახლში ჟურნალისტებს.

მისი თქმით, ახალი გზები „დამტკიცებულია სასამართლოს მიერ დღეს გამოტანილი გადაწყვეტილებით“.

„ახლა სხვა მიმართულებით ვაპირებ წასვლას, ალბათ, იმ მიმართულებით, რომლითაც პირველად უნდა წავსულიყავი. ეს ჩვენს თავდაპირველ არჩევანზე კიდევ უფრო ძლიერია“, - აღნიშნა ტრამპმა.

მან დაასახელა სხვადასხვა კანონი და მუხლი, რომლებსაც გამოიყენებს, მათ შორის 1974 წლის სავაჭრო აქტი და 1962 წლის სავაჭრო გაფართოების აქტი, თუმცა დასძინა, რომ ეს პროცესს უფრო ხანგრძლივს გახდის. 

ტრამპმა აღნიშნა, რომ უზენაესი სასამართლოს ამ გადაწყვეტილებამ „პრეზიდენტის უნარი, როგორც ვაჭრობის რეგულირებაში, ასევე ტარიფების დაწესებაში, უფრო ძლიერი და ნათელი გახადა“.