აშშ-ის პრეზიდენტმა ჯო ბაიდენმა უკრაინისთვის 2,4 მილიარდი დოლარის სამხედრო დახმარების ახალი პაკეტის შესახებ განაცხადა. ამასთან, ჯო ბაიდენი უკრაინის პრეზიდენტ ვოლოდიმირ ზელენსკის ორი მნიშვნელოვანი ელემენტის შესახებ ესაუბრა, რომლებიც რუსეთის მიერ დაწყებული ომის დასასრულებლად გადამწყვეტია. 

UNIAN-ის კორესპონდენტის ცნობით, ბაიდენმა ამის შესახებ თეთრ სახლში ზელენსკისთან შეხვედრის დასაწყისში განაცხადა. აშშ-ის პრეზიდენტმა აღნიშნა, რომ უკრაინელ კოლეგასთან ერთად აპირებს განიხილოს, თუ როგორ მოიპოვებს უკრაინა უპირატესობას ამ კონფლიქტში. ამასთან დაკავშირებით ბაიდენმა დაასახელა ორი ძირითადი ელემენტი, რომლებიც მომავალი შესაძლო მოლაპარაკებებისთვის უკრაინას გააძლიერებს.

„პირველ რიგში, ჩვენ ახლა უნდა გავამყაროთ უკრაინის პოზიციები ბრძოლის ველზე“, - ხაზგასმით აღნიშნა ბაიდენმა.

მან დასძინა, რომ სწორედ ამ მიზეზით, ის მოხარულია, გამოაცხადოს უკრაინის უსაფრთხოების დახმარების ახალი პაკეტის შესახებ, რომლის ღირებულებაც 2,4 მილიარდი დოლარია.

გარდა ამისა, ბაიდენმა პენტაგონს დაავალა, რომ უკრაინის უსაფრთხოებისთვის დამტკიცებული დაფინანსების დანარჩენი ნაწილი მისი პრეზიდენტობის ვადის ბოლომდე, 2025 წლის 20 იანვრამდე, გადაანაწილოს. ბაიდენის თქმით, ეს გააძლიერებს უკრაინის პოზიციას მომავალ მოლაპარაკებებში.

„მეორე, ჩვენ ვუყურებთ მომავალს, რათა უკრაინას გრძელვადიან პერსპექტივაში წარმატების მიღწევაში დავეხმაროთ“, - აღნიშნა აშშ-ს პრეზიდენტმა.

ბაიდენმა აღნიშნა, რომ უკრაინას ევროკავშირსა და ნატოში გაწევრიანების გზაზე მხარი უნდა დაუჭირონ და კორუფციასთან ბრძოლისა და დემოკრატიის განმტკიცებისკენ მიმართული რეფორმები უნდა გააგრძელონ.

აშშ-ის ლიდერმა ასევე განაცხადა, რომ აუცილებელია, უკრაინას მიაწოდონ საკმარისი შესაძლებლობები, რათა მან  რუსეთის მომავალი აგრესიის მოგერიება შეძლოს. ბაიდენმა ხაზგასმით აღნიშნა, რომ ორი ელემენტი, რომლებიც მან დაასახელა, ომის დასრულებისთვის გადამწყვეტია.

„რუსეთი ომში ვერ გაიმარჯვებს. უკრაინა გაიმარჯვებს და ჩვენ გავაგრძელებთ თქვენს გვერდით ყოფნას ყოველ ნაბიჯზე“, - განაცხადა ბაიდენმა.

თავის მხრივ, უკრაინის სახელმწიფოს მეთაურმა აღნიშნა, რომ ევროკავშირსა და ნატოში ინტეგრაციის გზაზე უკრაინა უპრეცედენტო რეფორმებს ატარებს.

ზელენსკიმ თქვა, რომ შეერთებული შტატების მიერ დღეს გამოცხადებული 7.9 მილიარდი დოლარის ღირებულების მხარდაჭერის პაკეტი დიდი დახმარება იქნება. უკრაინის პრეზიდენტმა ასევე აღნიშნა,  რომ ჯო ბაიდენთან „გამარჯვების გეგმის“ დეტალური განხილვისთვის ემზადება.

„დღეს ჩვენ ვემზადებით დეტალების განსახილველად გეგმის გასაძლიერებლად,” - თქვა ზელენსკიმ და დასძინა, რომ ორივე ქვეყნის გუნდი იმუშავებს მომავალი ნაბიჯების განხორციელების უზრუნველსაყოფად.