აშშ-ის სახელმწიფო მდივნის მარკო რუბიოს განცხადებით, შეერთებული შტატები ავღანეთის მოქალაქეებისთვის ვიზების გაცემას აჩერებს. ამის შესახებ რუბიო პლატფორმა X-ზე წერს. 

რუბიოს არ დაუკონკრეტებია რამდენ ხანს გაგრძელდება ვიზების მიღების შეჩერების პროცესი ან რა პირობებში შეიძლება ისევ განახლდეს. 

„სახელმწიფო დეპარტამენტმა შეაჩერა ვიზების გაცემის პროცესი ყველა პირისთვის, ვინც ავღანეთის პასპორტით მოგზაურობს. 

შეერთებული შტატებისთვის საკუთარი ხალხის დაცვა ყველაზე დიდი პრიორიტეტია“, - აცხადებს მარკო რუბიო. 

აღნიშნული გადაწყვეტილება მას შემდეგ იქნა მიღებული, რაც თეთრი სახლის მახლობლად სროლა იყო. სროლის შედეგად კი ეროვნული გვარდიის ორი ჯარისკაცი დაიჭრა, რომელთაგან ერთი მოგვიანებით გარდაიცვალა.

ამერიკელმა სამართალდამცველებმა სროლაში ეჭვმიტანილად 29 წლის ავღანელი რაჰმანულა ლაკანვალი დააკავეს. 

ამასთან, თეთრი სახლის ლიდერმა დონალდ ტრამპმა განაცხადა, რომ მას სურს „მესამე ქვეყნებიდან“ სამუდამოდ შეაჩეროს მიგრაციის პროცესი.