რუსეთის წინააღმდეგ ევროკავშირის სანქციების ახალი, 21-ე პაკეტი მოიცავს 30-ზე მეტ კომპანიას, რომლებიც ჩართულნი არიან დრონების წარმოებაში, ასევე, სხვა კომპანიებს, რომლებიც მხარს უჭერენ რუსეთის სამხედრო-სამრეწველო კომპლექსს. ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა კაია კალასმა ბრიუსელში ევროკომისიის მიერ სანქციების 21-ე პაკეტის წარდგენის შემდეგ განაცხადა.

„ჩვენ ასევე ვიღებთ ზომებს იმ კომპანიების წინააღმდეგ, რომლებიც მხარს უჭერენ რუსეთის სამხედრო-სამრეწველო კომპლექსს. ახალი სიები მოიცავს დრონების ინდუსტრიის 30-ზე მეტ კომპანიას“, - დაწერა კალასმა სოციალურ ქსელ X-ზე.

მისი თქმით, ექსპორტზე კონტროლის ახალი ზომები ასევე შეეხება 50 კომპანიას, მათ შორის ჩინეთში, თურქეთში, ყირგიზეთში, ყაზახეთში, არაბთა გაერთიანებულ საამიროებსა და ინდოეთში დაფუძნებულ ორგანიზაციებს.

„ჩვენ ასევე შევზღუდავთ დამატებითი მასალებისა და ტექნოლოგიების ექსპორტს, როგორებიცაა ნიკელის ფხვნილები, ლითონები და მაღალტექნოლოგიური შენადნობები, რათა კიდევ უფრო შევამციროთ რუსეთის წარმოების შესაძლებლობები. ასევე, შეიზღუდება ახალი საქონლის იმპორტი, მათ შორის ავტონაწილების, რამდენიმე ძვირფასი ლითონის მადნისა და ქიმიკატების“, - დასძინა ევროკავშირის უმაღლესმა დიპლომატმა.

We are also targeting companies providing support to Russia military-industrial complex.

The new listings will cover more than 30 designations in the drones manufacturing as well as new export control measures on 50 companies, including entities based in China, Türkiye,…

— Kaja Kallas (@kajakallas) June 9, 2026