ერდოღანი აცხადებს, რომ ისრაელი გამოგონილი მიზეზების გამო ღაზაში ცეცხლის შეწყვეტის შეთანხმებას მუდმივად არღვევს
„ისრაელი ღაზაში ცეცხლის შეწყვეტის შეთანხმებას გამოგონილი მიზეზებით არღვევს“, - ამის შესახებ თურქეთის პრეზიდენტმა რეჯეფ თაიფ ერდოღანმა სტამბოლში, მეცნიერების პოპულარიზაციისთვის ჯილდოების გადაცემის ცერემონიაზე სიტყვით გამოსვლისას განაცხადა.
ერდოღანის თქმით, ისრაელის ბომბების სამიზნე ღაზაში სკოლების 80%-ია, რაც 668 სკოლის შენობას ნიშნავს.
ამასთან, მისივე თქმით, თურქეთი ყველაფერს აკეთებს სამართლიანი და მდგრადი მშვიდობის უზრუნველსაყოფად, ცეცხლის შეწყვეტის შენარჩუნებისა და ჰუმანიტარული დახმარების უზრუნველსაყოფად.
„ისრაელი მუდმივად არღვევს ცეცხლის შეწყვეტის შეთანხმებას შეთხზული მიზეზების გამო. ვხედავთ, „ჰამასი”, ისრაელის პროვოკაციების მიუხედავად, მოთმინებით ინარჩუნებს ცეცხლის შეწყვეტის შეთანხმებას. ჩვენ მივესალმებით ამას“, - დასძინა თურქეთის პრეზიდენტმა.
