ბრიტანული სამაუწყებლო კორპორაციის, BBC -ს გენერალურმა დირექტორმა, ტიმ დეივიმ და BBC News-ის ხელმძღვანელმა დებორა ტერნესმა თანამდებობიდან გადადგომის შესახებ განაცხადეს. ამის შესახებ Deutche Welle იუწყება.

მათი გადადგომის მიზეზი აშშ-ის პრეზიდენტის, დონალდ ტრამპის გამოსვლის რედაქტირებული ვერსია გახდა, რომელიც პროგრამაში Panorama-ში გაჟღერდა. პროგრამაში დონალდ ტრამპის გამოსვლის ორი ნაწილი ისე დაამონტაჟეს, თითქოს ტრამპი 2021 წლის იანვარში კაპიტოლიუმზე შტურმისკენ მოუწოდებდა. თეთრმა სახლმა BBC ფეიკ-ნიუსების გავრცელებაში დაადანაშაულა.

„BBC, საერთო ჯამში, კარგად მუშაობს, მაგრამ გარკვეული შეცდომები იყო დაშვებული. მე, როგორც გენერალურმა დირექტორმა, საკუთარ თავზე პასუხისმგებლობა უნდა ავიღო. ისევე როგორც სხვა სახელმწიფო უწყებები, BBC-ც იდეალური არ არის და ჩვენ ყოველთვის უნდა ვიყოთ გახსნილები, გამჭვირვალეები და ანგარიშვალდებულები“, - განაცხადა ტიმ დეივიმ.

თავი მხრივ, დებორა ტერნესმა განაცხადა, რომ ის მომხდარზე პასუხისმგებლობას საკუთარ თავზე იღებს. ამასთანავე, ტერნესი მიკერძოებულობაში BBC-ს წინააღმდეგ გამოთქმულ ბრალდებებს სიცრუეს უწოდებს.