აზერბაიჯანში ოპოზიციური პარტიის ლიდერი დააკავეს
აზერბაიჯანის ოპოზიციური პარტიის „აზერბაიჯანის სახალხო ფრონტის“ ლიდერი ალი ქარიმლი დააკავეს, – ამის შესახებ პოლიტიკური პარტიის პრესსამსახური იტყობინება.
როგორც პარტიაში აცხადებენ, ქარიმლი სახელმწიფო უსაფრთხოების სამსახურის თანამშრომლებმა 29 ნოემბერს დააკავეს. მისი დაკავების მიზეზები ოფიციალურად არ გახმაურებულა.
ალი ქარიმლის გარდა, ჩხრეკა ჩატარდა პარტიის პრეზიდიუმის წევრის, მამედ იბრაჰიმის სახლში და წინასწარი ინფორმაციით, ისიც დააკავეს.
„ვაცხადებთ, რომ ალი ქარიმლის დაკავება პოლიტიკურად მოტივირებულია. ბოლო წლებში ხელისუფლებამ ის დე ფაქტო ბლოკადაში მოაქცია, შეუზღუდა წვდომა ინტერნეტზე, კომუნიკაციებსა და საზოგადოებრივ საქმიანობაზე. ამის მიუხედავად, ალი ქარიმლი აზერბაიჯანში მნიშვნელოვან დემოკრატიულ ფიგურად რჩება“, - აღნიშნულია პარტიის მიერ გავრცელებულ განცხადებაში.
