ევროპულმა საავიაციო კონცერნმა, Airbus-მა განაცხადა, რომ ყველაზე გავრცელებული მოდელის, A320-ის რემონტს აპირებს, რაც ამ კომპანიის მსოფლიოში არსებული მთელი საავიაციო პარკის პრაქტიკულად ნახევარს შეეხება. საუბარია 6000-მდე ავიალაინერის რემონტის აუცილებლობაზე. ეს ფაქტი მსოფლიო საავიაციო ინდუსტრიას სერიოზული პრობლემებით ემუქრება. ინფორმაციას thehindu.com ავრცელებს.

ეს Airbus-ის თვითმფრინავების ყველაზე მასშტაბური გაწვევაა კომპანიის არსებობის 55-წლიანი ისტორიის განმავლობაში. Airbus-სთვის უსიამოვნო ამბავი დაემთხვა ფაქტს, როდესაც A320-მა გაყიდვებით Boeing 737-ს გაასწრო.

ავიაკომპანიის ცნობით, ის გეგმავს უფრო ძველი თაობის პროგრამულ უზრუნველყოფაზე დაბრუნებას, რომელიც შედარებით უფრო მარტივია. პროგრამული უზრუნველყოფის შეცვლას სულ რამდენიმე საათი სჭირდება, მაგრამ, ამის მიუხედავად, ამან შეიძლება გამოიწვიოს რეისების გადადება ან გაუქმება აშშ-ში, ევროპაში, სამხრეთ ამერიკაში, ახალ ზელანდიაში და სხვა ქვეყნებში. American Airlines-მა განაცხადა, რომ მის პარკში არსებული A320-ის ტიპის 480 ავიალაინერიდან, რემონტი 340 თვითმფრინავს სჭირდება და თითოეული თვითმფრინავის პროგრამულ განახლებას დაახლოებით 2 საათი დასჭირდება.

დაახლოებით იგივე პრობლემების წინაშე აღმოჩნდებიან ავიაკომპანიები Lufthansa, IndiGo და easyJet. მათ უკვე გაავრცელეს ინფორმაცია, რომ რემონტის პერიოდში ამ ტიპის თვითმფრინავებს დროებით ექსპლუატაციიდან გაიყვანენ.

ყველაზე მეტად A320-ის რემონტი კოლუმბიის ავიაკომპანია Avianca-ს შეეხო. აუცილებელია ამ კომპანიის ავიალაინერების 70%-ის პროგრამული განახლება, რის გამოც კოლუმბიის ავიაკომპანიამ 8 დეკემბრამდე ბილეთების გაყიდვა შეაჩერა.

როგორც საავიაციო სფეროში არსებული წყაროები იუწყებიან, A320-ის რემონტი  მსოფლიოში არსებული ამ ტიპის თვითმფრინავების დაახლოებით 2/3-ს შეეხება. ამასთანავე, ზოგიერთმა ავიაკომპანიამ განაცხადა, რომ პროგრამულ განახლებას ის მოკლე დროში, რეისებს შორის მოახერხებს.

ინციდენტი, რის გამოც Airbus-მა A320-ის პროგრამული უზრუნველყოფის ძველ ვერსიაზე დაბრუნება გადაწყვიტა, 30 ოქტომბერს მოხდა. მაშინ ავიალაინერმა, რომელიც მექსიკიდან ნიუ-იორკში მიფრინავდა, მოულოდნელად სწრაფი, უკონტროლო დაშვება დაიწყო, რა დროსაც რამდენიმე ადამიანმა სხეულის დაზიანება მიიღო. პილოტები იძულებულები იყვნენ, რომ ავარიულად ფლორიდის შტატში დაფრენილიყვნენ.

Airbus-ის ცნობით, პრობლემა სიმაღლის ელერონების მართვის სისტემის გაუმართაობამ გამოიწვია. ის პილოტის კაბინიდან სიგნალს აწვდის თვითმფრინავის ელერონს და ასე ხდება ავიალაინერის მართვა, მისი მოხვევა მარჯვნივ ან მარცხნივ, სიმაღლის აკრეფა ან დაშვება. თუ სისტემა გაუმართავია, თვითმფრინავს სერიოზული საფრთხე ემუქრება.

ცნობისთვის, A320-ის ტიპის თვითმფრინავი პირველად 1984 წელს გამოუშვეს, ის პირველი რეაქტიული ავიალაინერი გახდა, რომელზეც „ფრენის კაბელებით მართვის“ კომპიუტერული სისტემა იყო დაყენებული.

A320-ის ბოლო მოდელები Boeing 737 MAX-ს სერიოზულ კონკურენციას უწევს, რადგანაც 2018 და 2019 წელს მომხდარი Boeing-ის კატასტროფების შემდეგ კომპანიამ მისი გამოყენება დროებით შეაჩერა. Boeing 737 MAX-ის კატასტროფის მიზეზებიც ცუდად შედგენილი პროგრამული უზრუნველყოფა გახდა.