რუსული არმია შემოდგომის შეტევისთვის ემზადება, რასაც ფრონტზე საოკუპაციო ძალების ფართომასშტაბიანი გადაჯგუფება ადასტურებს. რუსული სარდლობა, სავარაუდოდ, თავის ძალისხმევას დონეცკის ოლქის დანარჩენი ნაწილის აღებაზე ამახვილებს, - ამის შესახებ ინფორმაციას RBC-Ukraine ომის შესწავლის ინსტიტუტის (ISW) ანგარიშზე დაყრდნობით ავრცელებს.

როგორც ანალიტიკოსებმა აღნიშნეს, რუსეთის სამხედრო სარდლობამ დონეცკის რეგიონში ჩრდილოეთ სუმის ოლქიდან და ხერსონის მიმართულებით საზღვაო ქვეითთა ​​​​კორპუსის და საჰაერო-სადესანტო ძალების (APF) შედარებით „ელიტური“ დანაყოფები გადაიყვანა.

ამასობაში, პოკროვსკის მიმართულებით მებრძოლმა უკრაინელმა დამცველებმა კურსკის ოლქიდან 155-ე საზღვაო ქვეითთა ​​ბრიგადის მებრძოლების განლაგების  შესახებ განაცხადეს.

ადრე, რუსმა სამხედრო ბლოგერმა, რომელიც სავარაუდოდ დაკავშირებულია რუსეთის ფედერაციის ჩრდილოეთის ძალების ჯგუფთან, ასევე, განაცხადა სუმის ოლქის ჩრდილოეთიდან 177-ე საზღვაო პოლკისა და მე-40 საზღვაო ქვეითთა ​​ბრიგადის გადაყვანის შესახებ.

როგორც ISW აღნიშნავს, გადაადგილების შესახებ ცნობები მიუთითებს, რომ 2025 წლის შემოდგომაზე რუსული შეტევა დონეცკის ოლქის დანარჩენი ნაწილის, განსაკუთრებით დობროპილას, პოკროვსკის და კოსტიანტინივკას რაიონების, აღების მცდელობებზე იქნება ორიენტირებული.

„რუსეთის სარდლობის მიერ სუმის ოლქის ჩრდილოეთიდან დონეცკის რეგიონში ძალების გადანაწილება მიუთითებს, რომ რუსეთი ამცირებს სუმის ოლქში შეტევით ოპერაციებს“, - ნათქვამია ანგარიშში.

ექსპერტები ხაზს უსვამენ, რომ თავისი მიზნების მიღწევის მცდელობისას რუსეთი მნიშვნელოვან დანაკარგებს განიცდის, განსაკუთრებით ადამიანური რესურსების მხრივ.

ოკუპანტების წინა შეტევა 2024 წლის შემოდგომაზე, ასევე, პოკროვსკის მიმართულებით იყო ორიენტირებული.