2026 წლის ბიუჯეტის პროექტის საბოლოო ვერსიაში ინფრასტრუქტურის სამინისტროს დაფინანსება განისაზღვრა 3 113,7 მლნ ლარით, რაც პროექტის წინა ვერსიასთან შედარებით, გაზრდილია 16,8 მლნ ლარით, - ამის შესახებ ინფორმაციას ფინანსთა სამინისტრო ავრცელებს. 

ძირითადი პროგრამების მიხედვით ასიგნებები განისაზღვრა შემდეგი ოდენობით:

• საგზაო ინფრასტრუქტურის გაუმჯობესების ღონისძიებები - 1 538,8 მლნ ლარი, რაც პროექტის წინა ვერსიით განსაზღვრულ თანხას 123,5 მლნ ლარით აღემატება;
• რეგიონული და მუნიციპალური ინფრასტრუქტურის რეაბილიტაცია - 237,6 მლნ ლარი (გაზრდილია 53,4 მლნ ლარით);
• წყალმომარაგების ინფრასტრუქტურის აღდგენა-რეაბილიტაცია - 304,7 მლნ ლარი.
• საგანმანათლებლო ინფრასტრუქტურის მშენებლობა და რეაბილიტაციისთვის გამოყოფილი თანხა იზრდება 44,5 მლნ ლარით და 667,0 მლნ ლარს შეადგენს. პროგრამის ფარგლებში:
• საჯარო სკოლების მშენებლობა-რეაბილიტაციებისთვის გამოყოფილი თანხები განისაზღვრება 387,0 მლნ ლარის ოდენობით;
• განათლების რეფორმის ფარგლებში, თბილისსა და ქუთაისში საუნივერსიტეტო ინფრასტრუქტურის მშენებლობისთვის საჭირო შესყიდვების დასაწყებად გამოყოფილია 150,0 მლნ ლარი;
• საბავშვო ბაღების მშენებლობა-რეაბილიტაციისთვის გათვალისწინებულია 130,0 მლნ ლარი;
• ტურისტული ინფრასტრუქტურის გაუმჯობესების ღონისძიებები - 150,0 მლნ ლარი;
• სპორტული ინფრასტრუქტურის მშენებლობა-რეაბილიტაცია - 205,0 მლნ ლარი.