„ექსპერტიზის დასკვნაში ასახულია 39 დაზიანება, რაც ნიშნავს იმას, რომ გოგონამ სიკვდილამდე, საკმაოდ მძიმე გზა გაიარა,“ – ამის შესახებ დიდ დიღომში გარდაცვლილი 12 წლის გოგონას საქმის ადვოკატმა განაცხადა.

მისი ინფორმაციით, მიყენებული დაზიანებები მრავლობითია და თითქმის მთელს სხეულზეა.

„არის სისხლნაჟღენთები და ნაჭდევები, რომელიც არის სიცოცხლის დროინდელი და გარდაცვალებამდე ცოტა ხნით ადრეა მიყენებული. დაზიანებები რაიმე მკვრივი ბლაგვი საგნით არის მიყენებული.

საჭიროა გამოძიების წინაშე დაისვას ძალიან კრიტიკული კითხვები და დაინიშნოს კომპლექსური სამედიცინო ექსპერტიზა, რომელიც გასცემს პასუხს კითხვას, თუ რა ვითარებაში მიიღო პატარა გოგონამ დაზიანება.“ – განაცხადა ადვოკატმა.

შეგახსენებთ, რომ დიდ დიღომში 12 წლის მოზარდი გარდაცვლილი 17 მარტს იპოვეს. საქმეზე გამოძიება დამამძიმებელ გარემოებაში განზრახ მკვლელობის მუხლით დაიწყო.