რა თქმა უნდა, საჭიროა მტკიცებულებები, საჭიროა გარკვეული დოკუმენტაცია, თუ რაზე დაყრდნობით იქნა აღნიშნული გადაწყვეტილება მიღებული, - ამის შესახებ „ქართული ოცნების“ გენერალურმა მდივანმა, თბილისის მერმა, კახა კალაძემ ოთხი ქართველი მოსამართლის წინააღმდეგ აშშ-ის მიერ დაწესებულ სანქციებზე დასმული კითხვის პასუხად განაცხადა.

კალაძის თქმით, თუ დოკუმენტები არ იქნება წარმოდგენილი ამერიკული მხარის მიერ, მაშინ ეს აღქმული იქნება სუვერენული სახელმწიფოს დემოკრატიულ ინსტიტუციაზე ზეწოლად.

„მე ძალიან დიდი იმედი მაქვს იმისა, რომ აღნიშნული დოკუმენტები იქნება წარმოდგენილი, წინააღმდეგ შემთხვევაში, რა თქმა უნდა, ეს ძალიან ცუდი იქნება და პირდაპირ შეგვიძლია ვთქვათ, აღქმული იქნება ჩვენთვის და საზოგადოებისთვის სუვერენული სახელმწიფოს დემოკრატიულ ინსტიტუციაზე ზეწოლად. რა თქმა უნდა, ასეთი დამოკიდებულება და ასეთი გადაწყვეტილებები ამ ურთიერთობებს დააზიანებს“, - განაცხადა კალაძემ.

ამასთან, მოსამართლეებთან დაკავშირებით პარლამენტში საგამოძიებო კომისიის შექმნასთან დაკავშირებით, თბილისის მერმა განაცხადა, რომ გამოსაძიებელი არაფერია.

„სამწუხაროდ რეალობა არის ის, რომ გამოსაძიებელი არაფერი არ არის. ჩვენ გვეუბნებიან, რომ ვასანქცირებთ ადამიანებს და არ გავცემთ ამ კონკრეტულ ოთხ ადამიანზე ვიზას და ვერ შევლენ აშშ-ში, თუმცა არ გვეუბნებიან მიზეზი რა არის და რატომ“, - აღნიშნა კალაძემ.

როგორც „ქართული ოცნების“ ერთ-ერთმა ლიდერმა განაცხადა, როდესაც საუბარია მეგობრობაზე, ის ცალმხრივი ვერ იქნება.

„როდესაც საუბარია პარტნიორობაზე და როდესაც საუბარია მეგობრობაზე, რა თქმა უნდა, ამას ყოველთვის აქვს ორი მხარე, ცალმხრივი ვერ იქნება ეს. შესაბამისად, ჩვენ მთელი ამ წლების განმავლობაში ყველაფერს ვაკეთებდით, ვაკეთებთ და მზად ვართ მომავალშიც გავაკეთოთ, რომ ეს ურთიერთობები კიდევ უფრო გაღრმავდეს, კიდევ უფრო საინტერესო იყოს, თუმცა როდესაც ვისმენთ ასეთ გადაწყვეტილებებს, რომელიც რამდენიმე დღის წინ გაჟღერდა, რომელსაც არ აქვს არანაირი არგუმენტაცია, არანაირი მტკიცებულება, რა თქმა უნდა ეს ძალიან სამწუხაროა და ძალიან ცუდია“, - განაცხადა კალაძემ.

ცნობისთვის, აშშ-მ მიხეილ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს სანქციები ორი დღის წინ დაუწესა. ქართველი მოსამართლეების სანქცირების შესახებ აშშ-ის სახელმწიფო მდივანმა ენტონი ბლინკენმა განცხადება გაავრცელა, რომლის თანახმად, ამერიკის სახელმწიფო დეპარტამენტი მიხეილ ჩინჩალაძის, ლევან მურუსიძის, ირაკლი შენგელიას და ვალერიან ცერცვაძის საჯარო სანქცირებას ახდენს, ვიზის აკრძალვის შესახებ 7031(c) წესის საფუძველზე, მნიშვნელოვან კორუფციულ საქმიანობაში მათი ჩართულობის გამო.

როგორც განცხადებაში ბლინკენი განმარტავს, აღნიშნულმა პირებმა, ბოროტად გამოიყენეს მათი თანამდებობა როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ.
interpressnews.ge